منگلورو ، 16؍ مئی (ایس او نیوز) منگلورو کے سینٹ الوشیس کالج کے بوائز ہوسٹل کامپلیکس میں پولس اہلکاروں کے لئے خصوصی کووڈ کیئر سنٹر قائم کیا گیا ہے جہاں کورونا سے متاثر پولس اہلکار کورنٹائن کرسکیں گے۔
20 بستروں والے اس خصوصی سینٹر کا افتتاح سنیچر کو ڈپٹی کمشنر کے وی راجیندرا اور کمشنر آف پولس این ششی کمار کی موجودگی میں کیا گیا جس میں مینگلور سٹی کمشنریٹ میں خدمات انجام دینے والے پولس اہلکاروں کو کوویڈ ہونے پر بھرتی کیا جاسکے گا۔
اس موقع پر گفتگو کرتے ہوئے ششی کمار نے کہا کہ کورونا کی دوسری لہر میں قریب 65 پولس اہلکار کورونا سے متاثر ہوئے ہیں جبکہ ایک پولس اہلکار جمعہ کو فوت بھی ہوا ہے۔ اس سے قبل کورونا کی پہلی لہر میں قریب 300 پولس اہلکار متاثر ہوئے تھے۔
کمشنر آف پولس ششی کمار نے بتایا کہ کئی پولس اہلکاروں کو گھروں میں کورنٹائن ہونے کی سہولیات دستیاب نہیں ہے، جس کو دیکھتے ہوئے ڈائرکٹر جنرل اور انسپکٹر جنرل آف پولس پروین سود نے ایسے پولس اہلکاروں کے لئے کورنٹائن کی سہولیات فراہم کرنے کی ہدایت دی تھی، جس کو دیکھتے ہوئے یہ قدم اُٹھایا گیا ہے۔ مزید بتایا کہ ہلکی کورونا علامات کے حامل پولیس اہلکار جنہیں گھر پر خود کو کورنٹائن کرنے میں دقت پیش آتی ہو، وہ اس مرکز سے استفادہ کرسکیں گے جہاں تمام سہولتوں کے ساتھ طبی عملہ بھی موجود رہے گا۔