کووِڈ دوسری لہر: منگلورو میں 10 سے 20 اپریل تک لاگو ہوا رات کا کرفیو. خلاف ورزی کرنے پر ہوگی سخت کارروائی۔ ڈپٹی کمشنر اور پولیس کمشنر کی تنبیہ
منگلورو،10/اپریل (ایس او نیوز) کووِڈ کی دوسری لہر پر قابو پانے کے لئے مرکزی حکومت کی ہدایات پر ریاستی حکومت کی طرف سے جو احتیاطی تدابیر اختیار کی جارہی ہیں اس کے تحت منگلورو شہر میں 10 اپریل سے رات کا کرفیو جاری ہوگیا جو 20 اپریل تک جاری رہے گا۔
ضلع ڈپٹی کمشنر ڈاکٹر راجیندرا کے وی نے اس ضمن میں ہدایات جاری کرتے ہوئے کہا ہے کہ اس نئے اقدام کے مطابق شہر میں رات 10 بجے سے صبح 5 بجے تک کچھ اہم اور ضروری خدمات کو چھوڑ کر بقیہ تمام سرگرمیوں پر پابندی عائد رہے گی۔
کرفیو کے اوقات میں صحت سے متعلقہ سرگرمیوں پر کوئی پابندی نہیں ہوگی۔ بیمار شخص اور اس کے معاون کو طبی سہولت کے لئے سفر کرنے کی اجازت رہے گی۔ رات کے وقت ڈیوٹی انجام دینے ملازمین پہلے ہی کی طرح اپنی ڈیوٹی پر جا سکیں گے لیکن انہیں کرفیو کا وقت شروع ہونے سے پہلے اپنی کمپنی / کارخانہ وغیرہ میں پہنچ جانا ہوگا۔ آئی ٹی، ٹیلی فون اور دوسری خدمات انجام دینے والی کمپنیوں / اداروں کے لئے ضروری ہوگا کہ رات میں ڈیوٹی دینے والے عملہ کو شناختی کارڈ جاری کریں۔ انتہائی ضروری خدمات فراہم کرنے والی گاڑیاں، اشیائے ضروریہ لے جانے والی موٹر گاڑیاں ، ہوم ڈیلیوری، ای کامرس اور خالی موٹر گاڑیوں کو سڑک پر دوڑنے کی اجازت رہے گی۔ رات کے وقت بس، ریل یا طیارے سے آنے والے مسافروں کو ٹکٹ کی بنیاد پر آٹو رکشہ ، ٹیکسی وغیرہ سےموٹر اپنے اپنے مقام تک جانے کی بھی اجازت رہےگی۔
ضلع ڈپٹی کمشنر کے علاوہ سٹی پولیس کمشنر ششی کمار نے بھی پریس کانفرنس کے ذریعے عوام کو تنبیہ کی ہے کہ سٹی میونسپل کارپوریشن کے حدود میں سختی کے ساتھ کرفیو کا نفاذ کیا جائے گا جس کے لئے سی آر پی ایف اور سی اے آر کے جوانوں سے تعاون لیا جائے گا۔ اور مندرجہ بالا ہدایات کی پابندی نہ کرنے والوں پر ڈسٹیاسٹر منیجمنٹ ایکٹ، آئی پی سی اور دیگر قوانین کے تحت کارروائی کی جائے گی۔