منگلورو میں منشیات فروشی کے الزام میں 4 ملزمین گرفتار
منگلورو یکم /نومبر (ایس او نیوز) سٹی کرائم برانچ (سی سی بی) اور اکنانومک اینڈ نارکوٹک اسٹیشن کے پولیس افسران نے مشترکہ کارروائی کرتے ہوئے طالب علموں اور عوام کو مختلف قسم کی منشیات فروخت کرنے میں ملوث ٹولی کے 4ارکان کو گرفتار کرلیا۔
بتایاجاتا ہے کہ مصدقہ اطلاع کی بنیا د پر سی سی بی کے افسران نے نوجوانوں کی اس ٹولی پرشہر کے مورگن گیٹ علاقے میں اچانک دھاوا بول دیا جو دیگر ریاستوں سے کوکین، ایم ڈی ایم اے، اورایل ایس ڈی کی گولیاں اورچرس وغیرہ خریدا کرتی تھی اورشہر میں اسے فروخت کیا کرتی تھی۔گرفتار شدہ ملزمین کے نام کشن ہیگڈے (19سال)، ہابیل احمد (19سال)، اننتا کوڈوا(21سال)، گوپی ناتھ بھنڈارکر(24سال) بتائے گئے ہیں۔
پولیس کا کہنا ہے کہ اس نے ملزمین کے قبضے سے 22 گرام کوکین،75 ایم ڈی ایم اے گولیاں،10 گرام چرس(میریوانا) ضبط کیا ہے جس کی مجموعی مالیت کا اندازہ 2,50,000روپے لگایا گیا ہے۔اس کے علاوہ ملزمین کے پاس سے تین موبائل فون اور دو موٹر بائکس بھی ضبط کیے گئے ہیں جن کی قیمت 3لاکھ روپے بتائی جاتی ہے۔اس ضمن میں پولیس نے کیس درج کرلیا ہے اور مزید تحقیقات جاری ہیں۔