منگلورو،5؍اکتوبر (ایس او نیوز) آج صبح کے پی سی سی صدر ڈی کے شیوکمار کے مختلف ٹھکانوں پر سی بی آئی کے چھاپوں کی مذ مت میں یوتھ کانگریس صدر متھن رائے کی قیادت میں   ڈی کے شیوکمار کے حامیوں نے  منگلورو ملی کٹے   میں واقع کانگریس دفتر کے سامنے احتجاجی مظاہرہ کیا۔

احتجاجی مظاہرین نے سڑک پر ٹائرجلانے اور ٹریفک کو بلاک کرتے ہوئے ریاستی اور مرکزی حکومت کے خلاف نعرے بازی کی اور اس بات کا الزام عائد کیا کہ ضمنی انتخابات کو دیکھتے ہوئے حکومت  کے اشارے پر یہ  چھاپے مارے گئے ہیں۔

اس موقع پر پولس نے کووڈ پرو ٹوکول کی خلاف ورزی اور بغیر اجازت احتجاجی مظاہرہ منعقد کرنے کا الزام عائد کرتے ہوئے  متھن رائے سمیت  بہت سے کانگریس کارکنان کو حراست میں لے لیا۔

خیال رہے کہ کرناٹکا پردیش کانگریس کمیٹی کے صدر ڈی کے شیوکمار کے بنگلور کے ڈوڈاہلّی، کنک پورہ اور سداشیو نگرمیں واقع  مکانوں سمیت جملہ 14 ٹھکانوں پر آج پیر کو چھاپے مارے گئے ہیں بتایا گیا ہے کہ سی بی آئی نے ان چھاپوں سے قریب 50 لاکھ روپیہ نقد برآمد کیا ہے

بتاتے چلیں کہ ان چھاپے مار کاروائیوں کی سخت مذمت کرتے ہوئے مینگلور کے ساتھ ساتھ بنگلور، کولار، ہبلی اور ریاست کے کئی دیگر شہروں میں کانگریس کارکنان نے احتجاج کیا ہے اور سخت  ناراضگی کا اظہار کیا ہے۔