منگلورومیں تیز بخار کی وجہ سے 8سالہ بچے کی موت۔ عوام کو ڈینگی بخار کا شبہ۔ محکمہ صحت کے آفیسر نے کی تردید
منگلورو 18/جولائی (ایس او نیوز) ایک پرائیویٹ اسکول کی تیسری جماعت میں زیر تعلیم 8سالہ بچے کرش این سوورنا کی یہاں کے نجی اسپتال میں موت واقع ہوگئی ہے جس کے بارے میں عوام کو شبہ ہے کہ وہ ڈینگی بخار میں مبتلا ہوگیا تھا۔ لیکن ڈسٹرکٹ ملیریا کنٹرول آفیسر ڈاکٹر نوین کمار نے ڈینگی بخار سے موت ہونے کی تردید کردی ہے۔
معلوم ہوا ہے کہ کرش کو بہت بخار کی حالت میں اسپتال میں داخل کیاگیا تھا۔ پھر علاج کارگر نہ ہونے سے اس کی موت واقع ہوگئی۔ ڈاکٹر نوین کمار نے بتایا کہ عوام کو اس تعلق سے خواہ مخواہ تشویش میں مبتلا ہونے کی ضرورت نہیں ہے، کیونکہ کرش کی موت دل کے عضلات میں تعدیہ(انفیکشن) کی وجہ سے ہوئی تھی اور اسے ڈینگی بخارنہیں تھا۔
ڈاکٹر نوین کمار کا کہنا ہے کہ اس وقت ضلع کے پرائیویٹ اور سرکاری اسپتالوں میں ایک سو سے زائد ڈینگی کے مشتبہ مریض زیر علاج ہیں، اور تما م مریض روبصحت ہیں۔منگلورو سٹی کارپوریشن کی ٹیمیں 10مختلف کالجوں کے طلبہ کو ساتھ لے کر کارپوریشن حدود میں واقع گھروں پر جائیں گی اور عوام میں ڈینگی اور ملیریا جیسے وبائی امراض کے متعلق بیداری لانے کی مہم چلائے گی۔