موسلادھار برسات کی وجہ سے جنوبی کینرااور اڈپی ضلع کے ساحلی علاقے میں 336اسکولوں کو پہنچا نقصان
منگلورو26 /اگست (ایس او نیوز)امسال اگست میں ہوئی موسلا دھار بارش کی وجہ سے جنوبی کینرا اور اڈپی ضلع کے ساحلی علاقے میں 336اسکولوں کو سخت نقصان پہنچا ہے۔
دونوں اضلاع کے بلاک ایجو کیشن آفیسرز نے بارش سے اسکولوں کو ہونے والے نقصانات کا جائزہ لینے کے بعد اپنی رپورٹ محکمہ تعلیمات کے ڈپٹی ڈائریکٹرزکو سونپ دی ہے۔بتایاجاتا ہے کہ ان دواضلاع کے ساحلی علاقے میں جملہ 1,816 اسکول موجود ہیں۔ بہت سے اسکولوں کو بڑے پیمانے پر نقصان پہنچا ہے، لیکن عبوری انتظامات کے تحت وہا ں پردوسرے کمروں میں کلاسس چلائی جارہی ہیں۔
رپورٹ کے مطابق اڈپی ضلع کے مقابلے میں جنوبی کینرا میں زیادہ اسکولوں کو نقصان پہنچا ہے۔ سات تعلیمی بلاکس پر مشتمل اس ضلع میں 221اسکولوں کو برسات سے نقصان ہوا ہے۔سب سے زیادہ نقصان بنٹوال بلاک میں ہوا ہے۔جبکہ اڈپی ضلع میں جملہ 115اسکولوں کو نقصان پہنچا ہے۔
جنوبی کینرا کے ڈپٹی کمشنر سسی کانت سینتھل نے بتایا کہ ڈی ڈی پی آئی کی طرف سے پیش کردہ نقصانات کی رپورٹ ریاستی حکومت کو روانہ کردی گئی ہے۔