منگلورو ،28؍ اگست (ایس او نیوز) منگلورو سے تعلق رکھنے والے 2 نوجوان عمان مسقط الکلوف ساحل پر سمندر میں تیرنے کے دوران غرقاب ہوگئے جس کی وجہ سے ان کی موت واقع ہوئی ۔
    
جمعہ کے دن تفریح کے دوران سمندر میں غرقابی سے اپنی جان گنوانے والوں کی شناخت کوٹیپورا کے رہنے والے ضمیر اور رضوان آلیکلا کے طور پر کی گئی ہے ۔ رپورٹ موصول ہونے تک ضمیر کی لاش سمندر سے برآمد کرلی گئی تھی جبکہ رضوان کے لئے تلاشی مہم جاری تھی ۔ 
    
بتایا جاتا ہے کہ مسقط میں لاک ڈاون کی پابندیاں اٹھائے جانے کے بعد 27 اگست کو پہلا جمعہ دن تھا جو تعطیل اور تفریح کے لئے  مختص ہوتا ہے ۔ اس پس منظر میں ایک کمپنی کے 18 ملازمین تفریح کے لئے  ساحل سمندر پر گئے تھے جن میں ضمیر اور رضوان بھی شامل تھے ۔ عینی شاہدین کا کہنا ہے کہ جو نوجوان تیرنے کے لئے سمندر میں اترے ان میں سے 4 افراد موجوں میں بہہ گئے ۔ ان میں سے دو کو بچا لیا گیا جبکہ  ضمیر اور رضوان اچھے تیراک ہونے کے باوجود سمندر کی غیر متوقع گہرائی کا اندازہ نہیں لگا سکے اور موجوں کی تیزی میں بہنے کے بعد سمندر میں ڈوب گئے ۔
    
حادثہ کی اطلاع ملتے ہی سوشیل ڈیموکریٹک فورم کی ایک ٹیم جائے وقوع پہنچ گئی اور کمپنی کے پی آر او سے بات چیت کرتے ہوئے ضروری کاغذی کارروائی مکمل کرنے میں کمپنی کے مالکان کے ساتھ تعاون کیا ۔