منگلورو:23/ نومبر (ایس اؤنیوز)شہر منگلورو کے کچی میمن جامع مسجد کے خطیب ، عالم دین مولانا سید یوسف صاحب (87) منگلورو کے بیکرنکٹے پر واقع ان کے ذاتی مکان میں جمعرات کی صبح 5بجے اپنے مالک ِ حقیقی سے جاملے ۔ اناللہ وانا الیہ راجعون۔

موڈبیدرے کے مکین مولانا سید یوسف طویل عرصے تک بندرروڈ پر واقع کچی میمن مسجد میں خطیب کے طورپر خدمات انجام دیں، مولانا کے جمعہ کے خطبہ بہت مشہور تھے جس میں معاشرتی ، سماجی اور سیاسی حالات پر دینی نقطہ نگاہ سے روشنی ڈالتے تھے، ان کی اثراندازی کا عالم تھا کہ دور دور سے لوگ جمعہ کے لئے تشریف لاتے تھے ۔ ایک سماجی خدمت گار، امن و سلامتی کے داعی ،دیگر مذاہب کے مذہبی پیشواؤں کے ساتھ خیر سگالی ملاقاتیں و روابط، بھائی چارگی کا پیغام پہنچانے والے مولانا سید یوسف سابق میں جماعت اسلامی ہند منگلورو شاخ کے امیر بھی تھے۔

سادگی کے پتلے مولانا ہر مذہب کے لوگوں سے مل جل کر رہتے تھے یہی وجہ ہے کہ ان کے انتقال کی خبر سنتے ہی جمع ہونے والے سیکڑوں سوگواروں میں تمام مذاہب کے لوگ شامل تھے۔ مولانا کے پسماندگان میں بیوی، چار بیٹیاں ، دوبیٹے سمیت رشتہ دار ہیں۔ مولانا کے بیٹے ڈاکٹر احتشام کے مطابق کچی میمن مسجد میں نماز جنازہ ادا کرنے کے بعد مولانا کے گاؤں موڈبیدری لے جایا گیا  جہاں  کوٹیباگلو کی الصباح مسجد کے صحن میں تدفین  کئے جانے کی جانکاری دی ہے۔