منگلورو19/جون (ایس او نیوز) مُلکی پولیس اسٹیشن سے وابستہ پولیس افسران نے ایک بین الریاستی چوروں کی ٹولی سے تعلق رکھنے والے دو ملزمین کوگرفتار کرنے کے بعدان کے قبضے سے 40لاکھ روپے مالیت کا مسروقہ مال برآمد کیا ہے۔پولیس کا کہنا ہے کہ اس ٹولی کے دیگر2دیگر اراکین بھاگ نکلنے میں کامیاب ہوگئے۔
گرفتار کیے گئے ملزمین کی شناخت سوّاد عرف کریمنی (24) اور محمد سنان (19) کے طورپر کی گئی ہے جبکہ کے ایچ منیرکرناڈ اور ہیاچ کرناڈ نامی دو ملزمین فرار ہونے میں کامیاب ہوگئے ہیں۔ پولیس کا کہنا ہے کہ اس نے ان مفرور ملزمین کو گرفتارکرنے کے لئے جال بچھادیا ہے۔ملزمین کے پاس سے ضبط کیے گئے سامان میں مبینہ طور پر گوا سے چرائی گئی ایک ٹویوٹا فورچیونر کار، دو رویل اینفیلڈ موٹر بائکس، ایک ٹاٹا پِک اَپ ٹرک، بجاج پلسر موٹربائک اور تین قیمتی موبائل فونس شامل ہیں۔
تحقیقات کے دوران پولیس کو معلوم ہواہے کہ کاڈیکے، سنتے کٹّے اور دیگر علاقوں میں گھروں اور مندروں کے اندر چوری کے کئی واقعات میں اس ٹولی کا ہاتھ ہے جو چوریوں کے دوران ٹاٹاپک اپ ٹرک اور پلسر موٹر بائکس کا استعمال کیا کرتی تھی۔معلوم ہوا ہے کہ دن کے وقت ملزمین لکژری کار میں عام لوگوں کی طرح شریفانہ زندگی گزارتے تھے اور رات کے اندھیرے میں چوری کی وارداتیں انجام دیا کرتے تھے۔ اس طرح عوام کو ان کی زندگی کے گھناؤنے روپ کا ذرابھی اندازہ نہیں تھا۔اس لئے چوری کے بہت سارے معاملات کو سامنے رکھتے ہوئے پولیس اس ٹولی کے اراکین سے گہری تفتیش کررہی ہے۔
بین الریاستی چوروں کی ٹولی کو گرفتار کرنے کی مہم سٹی پولیس کمشنر سندیپ پاٹل کی نگرانی میں پولیس کے دیگر افسران اور عملے نے انجام دی۔