منڈیا، 31 ؍ جنوری (ایس او نیوز) سری رنگا پٹن میں رنگناتھ سوامی جاترا کے دوران تفریح کے لئے جائینٹ وھیل یا آسمانی جھولے میں بیٹھی ہوئی ایک 14 سالہ لڑکی اس وقت شدید زخمی ہوگئی جب اس کے سر کے بال وھیل میں پھنس گئے اور تیزی سے گھومتے ہوئے جھولے کی وجہ سے کھوپڑی کی چمڑی سمیت  بال اکھڑ گئے ۔
    
ذرائع سے ملی اطلاع کےمطابق رتھ اتسوا کےموقع پر میدان میں لگے جھولے پر مذکورہ لڑکی اپنے والدین کے ساتھ سوار ہوئی تھی ۔ جب جھولا تیز چل رہا تھا تو حادثاتی طور پر اس کے بال چکر میں پھنس گئے ۔ قریب بیٹھے ہوئے والدین نے پھنسے ہوئے بال نکالنے کی کوشش کی مگر جھولا تیز رفتار تھا اور دیکھتے ہی دیکھتے پوری کھوپڑی کی چمڑی کے ساتھ ہی بال اکھڑ گئے ۔ اس کی وجہ سے لڑکی شدید زخمی ہوگئی اور اس کے سر سے بہت زیادہ خون بہنے لگا۔ فوری طور پر ایمبولینس کے ذریعہ اسے تعلقہ اسپتال لے جایا گیا اور پھر وہاں سے بہتر علاج  کے لئے میسورو کے ایک نجی اسپتال میں منتقل کیا گیا ۔
    
اس ضمن میں پولیس نے جائنٹ وھیل کے عملہ سے تعلق رکھنے والے تین مرد اور ایک خاتون کو حراست میں لیا ہے ۔ سری رنگا پٹن پولیس اسٹیشن میں کیس درج کیا گیا ہے ۔