منڈیا 5 / جون (ایس او نیوز) وشوا ہندو پریشد اور بجرنگ دل کی طرف سے سری رنگا پٹن کی جامع مسجد میں 'ہنومان چالیسہ' پڑھنے کے لئے 'سری رنگا پٹن چلو' کا جو منصوبہ بنایا گیا تھا اسے پولیس نے پوری طرح ناکام بنا دیا ۔

    موصولہ رپورٹ کے مطابق شہر کے 5 کلو میٹر کے اطراف میں دفعہ 144 نافذ کرتے ہوئے امتناعی احکامات جاری کیے گئے تھے اور کسی کو بھی جامعہ مسجد میں داخل ہونے سے روکنے کے لئے سخت حفاظتی بندوبست کر دیا گیا تھا ۔ اس کے باجود تقریباً 500 سنگھی کارکنان نے سری رنگاپٹن کے مضافات میں واقع کیرنگور بنّیمنٹ کے قریب 'ہنومان چالیسہ' کا جاپ اور بھجن کا پروگرام منعقد کیا ۔ پھر وہاں سے نعرے بازی کرتے ہوئے سری رنگا پٹن شہر میں داخل ہونے کی کوشش کی مگر پولیس نے نیشنل ہائی وے پر بیریکیڈس لگا کر کاویری ندی کے پُل پر اس جتھے کو روک لیا ۔ 
    امن و امان میں خلل ڈالنے اور مسائل کھڑے کرنے کی جو کوشش سنگھ پریوار نے رچی تھی اس پر قابو پانے کے لئے ضلع انتظامیہ ، تعلقہ انتظامیہ اور پولیس نے جو کارروائی انجام دی ہے اس کی ستائش عوام کی طرف سے ہو رہی ہے ۔