نئی دہلی،22؍جنوری (ایس او نیوز؍ایجنسی) دہلی پولیس نے متحدہ عرب امارات (یو اے ای) حکومت کا اہلکار ظاہر کر کے دارالحکومت دہلی کے عالیشان لیلا پیلس ہوٹل سے 23 لاکھ کی دھوکہ دہی کرنے والے ایک شخص کو گرفتار کیا ہے۔ محمد شریف نامی ملزم ہوٹل سے کچھ قیمتی سامان بھی چوری کر کے فرار ہوا تھا۔

ایک سینئر پولیس افسر نے بتایا کہ ملزم کو 19 جنوری کو کرناٹک کے جنوبی کنڑ ضلع سے گرفتار کیا گیا۔ ملزم جس کی شناخت محمد شریف (41) کے طور پر ہوئی ہے، سروجنی نگر علاقہ میں واقع لیلا پیلس ہوٹل میں تین ماہ تک ٹھہرا اور 23 لاکھ روپے سے زیادہ کے بقایہ بل ادا کیے بغیر ہوٹل سے فرار ہوگیا۔ اس نے ہوٹل سے کچھ قیمتی سامان بھی چوری کیا تھا۔

ہوٹل کے عملے کے مطابق شریف یکم اگست 2022 سے 20 نومبر 2022 تک ہوٹل میں رہا اور 23,46,413 روپے کا بل ادا کیے بغیر فرار ہو گیا۔ درج کی گئی ایف آئی آر کے مطابق، اس شخص نے جعلی بزنس کارڈ کے ساتھ ہوٹل میں چیک کیا اور خود کا تعارف یو اے ای حکومت کے عزت مآب شیخ فلاح بن زید النہیان کے اہم عہدیدار کے طور پر کرایا۔

ایف آئی آر میں کہا گیا کہ اس نے ہوٹل میں ٹھہرنے سے قبل متحدہ عرب امارات کا رہائشی کارڈ بھی پیش کیا۔ اس شخص نے اگست اور ستمبر 2022 کے مہینے میں کمرے کے چارجز کی مد میں 11.5 لاکھ روپے کا حصہ بھی ادا کیا۔ کل بقایہ اب بھی 23,48,413 روپے ہیں۔ اس کے لیے اس نے پوسٹ ڈیٹڈ چیک جاری کیا تھا، لیکن وہ باؤنس ہوگیا۔ 20 نومبر 2022 کو دوپہر ایک بجے کے قریب ملزم ہوٹل کا قیمتی سامان لے کر فرار ہو گیا۔