بھٹکل: جدہ سے واپس منکی آنے کے دوران مینگلور میں ہی چل بسا ایک شخص
بھٹکل 2 اگست (ایس او نیوز) پڑوسی تعلقہ ہوناورکے منکی قصبہ سے تعلق رکھنے والا ایک 36 سالہ شخص جدہ سے مینگلور پہنچنے کے بعد اسپتال میں ہی چل بسا۔ انا للہ و انا الیہ راجعون۔
ذرائع سے ملی اطلاع کے مطابق محمد توفیق قاضی پچھلے پندرہ سالوں سے سعودی عربیہ کے شہر جدہ میں ملازمت کرتا تھاا، ذیابیطس اور بلڈ پریشر کی شکایت ہونے پر کل یکم اگست کو چارٹرد فلائٹ پر نشست بک کی تھی اور واپس آنے کے لئے فلائٹ پر سوار ہوا تھا۔ یکم اگست صبح قریب 11:30 بجے فلائٹ جب مینگلور لینڈ ہوئی تو طبیعت مزید بگڑ گئی جس کی وجہ سے اسے ائرپورٹ سے سیدھے وینلاک اسپتال لے جایا گیا۔
اطلاع ملی ہے کہ علاج کارگر ثابت نہیں ہوا اور سنیچر رات کو اسپتال میں ہی انتقال کرگیا۔
خبر ملی ہے کہ کل ہی اس کی کورونا جانچ بھی ہوئی تھی اور رپورٹ نیگیٹو آچکی ہے۔
میت حاصل کرنے اور کاغذی کاروائی مکمل کرنے منکی سے اس کے رشتہ دار مینگلور پہنچ چکے ہیں۔ مینگلور میں بھٹکلی جماعت المسلمین کی جانب سے بھی میت حاصل کرنے تعاون کیا جارہا ہے۔
شادی شدہ محمد توفیق کو تین بچے ہیں، اللہ تماموں کو صبرجمیل عطا فرمائے اور مرحوم توفیق کی بھرپور مغفرت فرمائے۔ اٰمین
