بھٹکل 20/اگست (ایس او نیوز) پڑوسی تعلقہ ہوناور کے منکی میں زمین کے معاملے کو لے کر ایک بھائی نے دوسرے بھائی کا قتل کردیا جبکہ اُس کی بیوی جو بیچ بچائو کرنے کی کوشش کررہی تھی، زخمی ہوگئی، واردات آج پیر دوپہر کو منکی کے تالمکّی میں پیش آئی ۔
مرنے والے کی شناخت مہابلیشور ہالپّا نائک (65) کی حیثیت سے کی گئی ہے۔ بتایا گیا ہے کہ حملے میں مہابلیشور کی بیوی کو شدید زخمی حالت میں اسپتال میں داخل کیا گیا ہے۔
ذرائع نے بتایا کہ زمین کے معاملے کو لے کرمہابلیشور نائک اور اس کے چچازاد بھائی اُمیش لکشمن نائک کے درمیان جھگڑا شروع ہوگیا اور آپے سے باہر اُمیش نے مہابلیشور کے سر پر دھاردار آلے سے حملہ کردیا، جس سے مہابلیشور بری طرح زخمی ہوکر وہیں دم توڑ دیا۔ بتایا گیا ہے کہ اس دوران مہابلیشور کی بیوی رما نائک نے جب اُمیش کو حملہ کرنے سے روکنے کی کوشش کی تو اُس کے سر پر بھی چوٹ لگی، جس کے نتیجے میں اُسے ہوناور اسپتال میں داخل کیا گیا ہے۔
منکی سے ساحل آن لائن کے نمائندے ذاکر کٹنگری نے بتایا کہ قتل کو لے کر منکی پولس تھانہ میں معاملہ درج کرتے ہوئے اُمیش لکشمن نائک (52) کو گرفتار کرلیا گیا ہے جبکہ ہوناور سرکل پولس انسپکٹر چلوراج کی قیادت میں منکی پی ایس آئی میتھو گوڈا معاملے کی جانچ کررہی ہیں۔