منگلورو6/جون (ایس او نیوز) یہاں سے قریب 25 کلو میٹر دور مُلکی میں  ایک نوجوان کاروباری شخص کا دن دہاڑے بہیمانہ انداز میں قتل کیا گیاجس کے بارے میں بتایا جاتا ہے کہ یہ پرانی رقابت کا نتیجہ ہے۔ واردات جمعہ کو پیش آئی۔اس تعلق سے آج سنیچر کو پولس نے  چار لوگوں کو گرفتار کرلیا ہے اور چھان بین جاری ہے ۔

ذرائع سے ملی اطلاع کے مطابق  مقتول  عبداللطیف (38)  موڈبیدری کا ایک تاجر تھا۔عینی شاہدین کے مطابق تقریباً 8اجنبی افراد کار اور موٹر بائک پرآئے اور منیر، عبداللطیف اور اس کے ساتھ موجود لوگوں پر تلواروں، سوڈا بوتلوں اور دیگر ہلاکت خیز ہتھیاروں سے حملہ کردیا۔قتل کی یہ واردات لوگوں سے بھرے پرے مقام پر مُلکی  پولیس اسٹیشن کے حدود میں ایچ ڈی ایف سی بینک کے قریب انجام دی گئی۔  معلوم ہوا ہے کہ اس حملے میں عبداللطیف کے ساتھ موجود دیگر تین افراد شدید زخمی ہوگئے ہیں۔جن کی شناخت منیر، ایاز اور عمران کے طور پر کی گئی ہے۔ ان زخمیوں کو منگلورو کے نجی اسپتال میں داخل کیا گیا ہے۔

 ذرائع سے ملی اطلاع  کے مطابق منیر جو ایک کاروباری شخص ہے اس کے ساتھ کچھ لوگوں کی پرانی دشمنی چل رہی تھی۔ اسی کے نتیجے میں جب حملہ کیا گیا تو اس کے ساتھ اس کا داماد عبداللطیف بھی موجود تھا،جو اس حملے میں ہلاک ہوگیا۔

واقعے کی اطلاع ملتے ہی منگلورو اے سی پی بیلی اپا، مُلکی  ایس ایچ او جئے رام گوڈا اور دیگر اعلیٰ افسران نے جائے واردات پر پہنچ کر معائنہ کیا۔ کیس درج کرلینے کے بعد پولیس ملزمین کی تلاش میں شروع کردی۔ اس تعلق سے  اطلاع ملی ہے کہ سنیچر کو پولس نے چار لوگوں کو گرفتار کرلیا ہے جن کی شناخت اُڈپی کے رہنےوالے ابوبکر صدیق (27) اور مُلکی کے رہنے والے نثار عرف ریاض (33)،  محمد رضیم (24) اور محمد ہاشم (27) کی حیثیت سے کی گئی ہے۔ پولس مزید چھان بین کررہی ہے۔