دبئی کی ایک عمارت سے گر کربھٹکل کے قریب شیرور کا ایک شخص جاں بحق
دبئی 4 ڈسمبر (ایس او نیوز/مصطفیٰ) پار دبئی کی ایک عمارت کے سکینڈ فلور سے گر کربھٹکل کے پڑوسی علاقہ شیرور کا ایک شخص جاں بحق ہوگیا جس کی شناخت محمد عمران ڈڈّی (37) کی حیثیت سے کی گئی ہے۔
ایک عینی شاہد نے عمران کے چاچا ابراہیم کو بتایا کہ عمران کواُس نے فجر کی نماز کے وقت وضو کرکے باہر نکلتے ہوئے دیکھا تھا، وہ وضو کرکے غالباً فون کرنے کے لئے ائیرہول والی کھڑکی پرنٹ ورک حاصل کرنے کے لئے بیٹھا تھا، بعد میں کیا ہوا پتہ نہیں چلا، صبح قریب گیارہ بجے کسی شخص نے اس کی نعش کمرے کے ائیر ہول کے نیچے (عمارت کے اندرونی حصے میں) گراونڈ فلور پر خون میں لت پت حالت میں دیکھ کر لوگوں کو خبر کی۔ واقعے کی اطلاع ملتے ہی دبئی پولس جائے وقوع پر پہنچی اور نعش کواپنے قبضے میں لے کر سرکاری راشد اسپتال پہنچایا۔
محمد عمران پار دبئی میں معروف اسٹوریا ہوٹل کے قریب واقع ایک عمارت میں واچ مین کی حیثیت سے کام کررہا تھا، قریب ایک سال قبل وہ شیرور جاکر واپس دبئی لوٹا تھا۔ عمران کے چاچا جناب ابراہیم ڈڈّی نے بتایا کہ شیرور میں اس کی بیوی اور ایک ڈھائی سالہ لڑکی ہے، عمران کی اچانک موت سےاس کی اہلیہ پر غم کا پہاڑ ٹوٹ پڑا ہے جبکہ اس کی بچی اپنے والد کی شفقت سے محروم ہوگئی ہے۔ اللہ صبر جمیل عطا فرمائے اور عمران کی بال بال مغفرت فرمائے۔ اٰمین
جناب ابراہیم نے بتایا کہ میت کو حاصل کرنے کے لئے کاغذی کاروائی جاری ہے۔ تمام لوازمات کے بعد میت کو شیرور روانہ کرنے کی کوشش کی جائے گی۔ انہوں نے عوام الناس سے مرحوم عمران کے حق میں مغفرت کی دعاوں کی درخواست کی اور گھروالوں کو صبر جمیل عطا کرنے کی دعاوں کی اپیل کی ہے۔