بلاری کےکانا ہوساہلّی میں نامعلوم سواری کی ٹکر میں راہ گیر ہلاک؛ عوام نے ہائی وے پر سے نعش ہٹانےسے کیا انکار ؛ ہائی وے بلاک
کانا ہوساہلّی 4 مارچ (ایس او نیوز) ضلع بیلاری کے کانا ہوساہلّی نیشنل ہائی وے 50 پر جمعرات کو ایک نامعلوم سواری کی ٹکر میں ایک اڈھیڑ عمر کا شخص موقع پر ہی ہلاک ہوگیا جس کی شناخت موسٹلگومّی پاپنّا (65) کی حیثیت سے کی گئی ہے۔
بتایا گیا ہے کہ پاپنّا جمعرات صبح ہائی وے کراس کررہا تھا کہ ایک تیز رفتار سواری اس سے ٹکرا کر فرار ہوگئی۔ پاپنّا کی موقع پرہی موت واقع ہوگئی، مقامی لوگوں کو حادثے کی اطلاع ملتے ہی بڑی تعداد میں جائے وقوع پرجمع ہوگئے اور نعش کو سڑک پر سے ہٹانے سے انکار کرتے ہوئے وہیں دھرنے پر بیٹھ کر احتجاج کرنے لگے۔
احتجاجیوں کا کہنا ہے کہ دیہات کے درمیان سے ہائی وے گذرتی ہے اور روڈکے دوسری طرف ہائی اسکول ہے تو وہیں کھیت بھی ہیں ۔ ایسے میں لوگوں کو اسکول یا کھیت جانے کے لئے ہائی وے کو کراس کرنا ضروری ہوتا ہے اور اس کے نتیجے میں حادثات کی شرح بڑھتی جارہی ہے۔ ان لوگوں نے بتایا کہ یہاں عوام کے گذر کے لئے ہائی وے پر انڈر پاس تعمیر کرنے کی مانگ کرتےہوئے گذشتہ روز بھی روڈ بلاک کرکے احتجاج کیا گیا تھا، ابھی پھر حادثہ پیش آیا ہے اور ایک شخص کو اپنی جان گنوانی پڑی ہے۔ احتجاجیوں کا کہنا تھا کہ جب تک عوام کو ایک جگہ سے دوسری جگہ گذرنے کے لئے نیشنل ہائی وے پر انڈر پاس تعمیر کرکے نہیں دیا جائے گا وہ روڈ پر سے نہیں ہٹیں گے۔
ہائی وے بلاک کرنے سے سڑک کے دونوں طرف سواریوں کی لائن لگ گئی ۔
اطلاع ملتے ہی تحصیلدار ایس مہابلیشور، کوٹّور پولس انسپکٹر دوڈنّا، کانا ہوساہلّی پی ایس آئی ایچ ناگراج سمیت دیگر اہلکار جائے وقوع پر پہنچے اور عوام سے نعش کو ہٹانے کی اپیل کی۔