سرسی 28/جون(ایس او نیوز) چوری کے الزم میں گرفتار کیا گیا ایک شخص کووِڈ پوزیٹیو نکلا ہے جس کی وجہ سے سرسی پولیس اسٹیشن کا عملہ سخت پریشان ہوگیا ہے۔

اطلاع  کے مطابق چوری کے الزام میں منی پال کے اندر جیل کی سزاکاٹنے کے بعد باہر نکلنے والا ایک شخص ایک اور چوری کی واردات میں ملزم کے طور پر دھارواڑ پولیس کے ہتھے چڑھ گیا۔سرسی میں ایک بائک کی چوری میں اس شخص کا ہاتھ ہونے کی وجہ سے سرسی پولیس اس کو دھارواڑ سے سرسی لے آئی۔ جب اس کو سرسی سب جیل میں رکھا گیا تھا تو اس کے اندر کورونا کی علامات دکھائی دیں جس پر عدالت نے اس کی طبی جانچ کروانے کا حکم دیا۔جب اس کے گلے سے تھوک کا نمونہ لے کر جانچ کی گئی تو اس میں کووِڈ کا عارضہ پایا گیا۔

 اب سرسی پولیس کے عملے اور افسران کے لئے ایک نیا دردسر شروع ہوگیا ہے کیونکہ اس کی گرفتاری اور جیل میں قید رکھنے کے دوران سرکل پولیس انسپکٹر سمیت تقریباً 10پولیس والے اس کے ابتدائی  رابطے میں آ گئے تھے۔اس لئے اس کے رابطے میں آنے والے مزید افراد کی نشاندہی کرنے اور ان کی طبی جانچ کرنے کا کام انجام دیا جارہا ہے۔ اس کے علاوہ سرسی سب جیل کامپلیکس اور ٹاؤن پولیس اسٹیشن کو سیل ڈاؤن کرنے کے بھی امکانا ت ہیں۔