کل جماعتی میٹنگ میں نہیں آئیں گی ممتا، کہا ’ایک ملک ایک انتخاب‘ پر نہ کریں جلدبازی
نئی دہلی،18/جون (ایس او نیوز/آئی این ایس انڈیا) مغربی بنگال کی وزیر اعلی ممتا بنرجی اور مرکز کی مودی حکومت کے درمیان چل رہی دراڑ ابھی تک ختم نہیں ہوئی ہے۔پہلے ممتا نے وزیر اعظم نریندر مودی کی حلف برداری کی تقریب میں آنے سے انکار کیا اور اب کل جماعتی میٹنگ میں آنے سے بھی انکار کر دیا ہے۔اس کل جماعتی میٹنگ کا ایجنڈا ’ایک ملک ایک انتخابات‘ ہے جو کہ 19 جون کو ہونی ہے۔یہ میٹنگ وزیر اعظم نریندر مودی نے بلائی ہے، جس میں تمام سیاسی جماعتوں کے لیڈران کو دعوت دی گئی ہے۔ممتا بنرجی نے وزیر پارلیمانی امور پرہلاد جوشی کو خط لکھ کر اس میٹنگ میں آنے سے انکار کر دیا ہے۔ممتا نے کہا ہے کہ سب سے پہلے مرکزی حکومت کو اس معاملے پر قانونی ماہرین سے تبادلہ خیال کرنا چاہئے۔اس معاملے میں جلدبازی کرنا ٹھیک نہیں ہے، لہذا نہ وہ اس میٹنگ میں آئیں گی اور نہ ہی ان کی پارٹی ترنمول کانگریس (ٹی ایم سی) کا کوئی نمائندہ اجلاس میں شامل ہوگا۔غورطلب ہے کہ ایک ملک ایک انتخاب کے مسئلے کو بھارتیہ جنتا پارٹی کافی وقت سے اٹھاتی رہی ہے۔اپنے منشور میں اس کا بھی وعدہ کیا تھا۔اس کے تحت ملک میں لوک سبھا انتخابات اور اسمبلی انتخابات ساتھ کرائے جانے کی بات ہے،اگرچہ ممتا نے اسی خط میں لکھا ہے کہ مرکزی حکومت کو بابائے قوم مہاتما گاندھی کی 150 ویں یوم پیدائش کے موقع پر مہاجشن کی تیاری کر رہی ہے اس میں شریک ہونے کے لئے وہ تیار ہیں،اگر پارلیمانی وزیر اس معاملے پر اجلاس کرتے ہیں، جس میں پارلیمنٹ کس طرح سے مسلسل چلائی جائے اسی پرغور ہو تو ان کی پارٹی اور دیگر اپوزیشن پارٹیاں بھی آنے کو تیار ہوں گی۔