مسقط: روی کی ظفار بلڈنگ میں لگ گئی زبردست آگ؛ آگ پر قابو پانے کی کوشش جاری؛ بھٹکل کے لوگوں کی دکانیں اور فلیٹس بھی جل کر خاکستر
بھٹکل 11 فروری (ایس او نیوز) مسقط کے روی میں اولڈ پولس اسٹیشن سے متصل ظفار (Dhofar) بلڈنگ کی ایک دکان سے بھڑکی آگ نے پل بھر میں پوری عمارت کو اپنی لپیٹ میں لے لیا جس کے نتیجے میں بھٹکل کے کئی لوگوں کی دکانیں اور فلیٹس بھی زد میں آگئی ہیں۔ رات ساڑھے بارہ بجے ملی اطلاع کے مطابق آگ پر قابو پانے کی کوشش جاری ہے، مگر ابھی ابھی عمارت کے اندر ایک سلینڈر بلاسٹ ہونے کی آواز آئی ہے۔ جس کے بعد آگ مزید تیز ہوگئی ہے۔
روی میں مقیم بھٹکلی جماعت کے ایک ذمہ دار نے بتایا کہ مغرب نماز کے وقت یعنی شام قریب 6:15 بجے ایک دکان میں شارٹ سرکیوٹ سے آگ لگ گئی تھی جو کافی تیزی کے ساتھ پھیل گئی اور پوری عمارت کو اپنی لپیٹ میں لے لیا۔ انہوں نے بتایا کہ جس وقت آگ کے شعلے بلند ہوئے، اکثر لوگ مغرب کی نماز کے لئے گئے ہوئے تھے۔
بتایا گیا ہے کہ یہ روی کی کافی پرانی مگر تجارت کے لحاظ سے اہم مارکٹ ہے جہاں گاہک بڑی تعداد میں خریدوفروخت کے لئے آتے ہیں اور اکثر بھیڑ لگی رہتی ہے۔ اس تجارتی کامپلیکس میں کم و بیش 25 دکانیں اور اوپری مالوں پرکئی رہائشی فلیٹس ہیں۔ چھ منزلہ عمارت میں بھٹکل سے تعلق رکھنے والوں کی بھی پانچ دکانیں اور غالباً پانچ فیملیس رہائش پذیر ہیں۔ پتہ چلا ہے کہ ان کی دکانیں اور فلیٹس بھی آگ کی زد میں آگئی ہیں۔
آگ لگنے کی اطلاع ملتے ہی فائر بریگیڈ کا عملہ جائے وقوع پر پہنچااور آگ پر قابو پانے کی کوششوں میں مصروف ہوگیا۔ آگ لگنے کی وجہ سے اوپری منزلہ کے فلیٹس میں کئی لوگ پھنس گئے تھے جن کو فائر بریگیڈ کا عملہ کرین کی مدد سے بچانے میں کامیاب ہوگیا۔ بعض بھٹکلی افراد کوبھی متاثرہ عمارت سے باہر نکالنے کے بعد سانس لینے میں تکلیف ہونے کی وجہ سے اسپتال لے جانے کی خبر ہے، مگر اللہ تعالیٰ کے فضل سے سبھی محفوظ ہیں۔
متعلقہ عمارت کے سامنے والی عمارت میں موجود ایک عینی شاہد نے ساحل آن لائن سے فون پرگفتگو کرتے ہوئے بتایا کہ انڈین وقت کے مطابق رات ساڑھے بارہ بجے (عمانی وقت کے مطابق رات گیارہ بجے تک فائر بریگیڈ کا عملہ آگ پر قابو پانے میں مصروف ہے، لیکن آگ کے شعلے بڑھتے نظر آرہے ہیں، اس کے مطابق پورے علاقہ میں دھواں بھرا ہوا ہے اور سامنے کرین کی مدد سے کچھ دیر پہلے بھی کسی کو عمارت کے اندر سے باہر نکالتے ہوئے دیکھا گیا ہے۔ آخری اطلاع ملنے تک آگ پر قابو پانے کی ہرممکن کوشش جاری تھی ۔ فی الحال کسی جانی نقصان کی کوئی اطلاع نہیں ہے۔