نئی دہلی،2/دسمبر(ایس او نیوز/یو این آئی) راجدھانی دلی میں پیرا گڑھ علاقے کے ادیوگ نگر کی ایک فیکٹری میں جمعرات کی صبح آگ لگ گئی جس کی زد میں آکر زخمی ہوئے 14 لوگوں کو نزدیکی اسپتال میں داخل کرایا گیا ہے۔ فائر بریگیڈ کے ایک افسر نے بتایا کہ آج صبح چار بجکر 12 منٹ پر پیرا گڑھی، ادیوگ نگر کے ڈی۔7 میں ایک فیکٹری میں آگ لگنے کی اطلاع ملی۔ اطلاع ملنے کے فوراً بعد فائر بریگیڈ کی 35 گاڑیوں کو جائے واقعہ کے لئے روانہ کردیا گیا۔
افسر نے بتایا کہ راحت اوربچاؤ مہم کے دوران اچانک ایک دھماکہ ہوا جس کے سبب فیکٹری کی عمارت کی ایک دیوار منہدم ہوگئی جس میں فائر بریگیڈ کے اہلکار سمیت کئی دیگر افراد پھنس گئے۔ فیکٹری سے 14 زخمیوں کو نکالا گیا ہے جن میں 13 فائر بریگیڈ کے اہلکار ہیں۔ راحت اور بچاؤ مہم اب بھی جاری ہے۔
واضح رہے کہ گزشتہ ایک ماہ کے دوران آگ لگنے کا یہ تیسرا واقعہ ہے۔ گزشتہ آٹھ دسمبر کو اناج منڈی کی ایک فیکٹری میں آگ لگنے سے 44 لوگوں کی موت ہوگئی تھی اور اس کے بعد 23 دسمبر کو کراڑی میں ایک کپڑا گودام میں آگ لگنے سے نو لوگوں کی موت ہوگئی تھی۔