ہوائی شورمیں بنیادی مسائل دبائے جارہے ہیں،بی جے پی کے دماغ میں پاکستان سماگیاہے، وزیراعظم تھوڑاوقت ملک کودے پاتے،’’ناچ نہ جانے پاکستان ٹیڑھا‘‘ کنہیا کا گری راج سنگھ پر حملہ
نئی دہلی/بیگوسرائے :18 /اپریل(ایس اونیوز /آئی این ایس انڈیا) سی پی آئی کے بیگوسرائے کے امیدوار کنہیا کمار کی تیاری زوروں پر ہے۔ بہار کے بیگو سرائے سیٹ سے کنہیا کمار کا مقابلہ مرکزی وزیر گری راج سنگھ اور آر جے ڈی کے تنویر حسن سے ہے۔کنہیا کمار نے اس درمیان فیس بک پر پوسٹ لکھ کر بی جے پی امیدوار گری راج سنگھ پر جم کر حملہ بولا۔ کنہیا کمار نے لکھا کہ:’ویزا منتری جی گزشتہ پانچ سال کے اپنے پانچ بڑے کام بھلے نہ شمار کرا پائیں، لیکن پاکستان کا نام 5000 بار لے چکے ہوں گے۔ پاکستان ان کے دماغ میں اس طرح سماگیا ہے کہ انہیں کیرالہ میں پاکستان نظرآرہاہے۔ اس جذبے کو کیا نام دیا جائے؟ اگر وہ تھوڑا وقت اپنے ملک کو دے پاتے، تو آج بیگو سرائے میں ہماری امیدوں کی ترقی ہوتی۔ کبھی کیرالہ میں پاکستان دیکھنے والے وزیر کے بیان کا ویڈیو تو کبھی ہندوستانیوں کو پاکستان بھیجنے والے بیان کا ویڈیو۔ زمین کے مسائل کی بات نہیں ہوتی، بس ہوا ہوائی مسائل کے شور میں حقیقی مسائل کو دبایا جاتا ہے۔کنہیا نے لکھا کہ : ’ملک میں بے روزگاری نے گزشتہ 45 سال کا ریکارڈ توڑ دیا ہو، تب روزگار پر بات نہ کرکے عوام کو فرضی مسائل میں الجھا جایا جاتا ہے ۔ مسلمان اوراگلے پاکستان کو بھلا برا کہہ کر اپنی ذمہ داری سے فرار ہونے کی چھوٹ نہیں ملے گی۔ کنہیاکمارنے گری راج کی تنقید کرتے ہوئے لکھا کہ : ’ویزا وزیر کے بارے میں تو یہی کہنا ٹھیک ہوگا ’’ناچ نہ جانے پاکستان ٹیڑھا ۔
