نئی دہلی، 12/ستمبر (ایس او نیوز /ایجنسی) ترنمول کانگریس کی رکن پارلیمنٹ مہوا موئترا نے بدھ، 11 ستمبر کو وشو ہندو پریشد کی جانب سے منعقدہ ایک پروگرام میں شرکت کرنے والے سپریم کورٹ کے سابق جسٹس ہیمنت گپتا پر تنقید کی۔ جسٹس ہیمنت گپتا، جو اکتوبر 2022 میں سپریم کورٹ سے ریٹائر ہوئے تھے، نے وی ایچ پی کے پروگرام میں اپنی موجودگی کا دفاع کرتے ہوئے کہا کہ وہ "ہندوستان کے شہری" کے طور پر موجودہ مسائل پر گفتگو کرنے کے لیے اس تقریب میں شامل ہوئے تھے۔

دی کوئنٹ نے جسٹس گپتا کا حوالہ دیتے ہوئے کہا، "جہاں تک ریٹائرمنٹ کے بعد اس طرح کی تقریبات میں حصہ لینے والے ریٹائرڈ ججوں کا تعلق ہے، میں دوسروں کے بارے میں تبصرہ نہیں کر سکتا، لیکن مجھے موجودہ مسائل اور موضوعات پر بحث کرنے اور ان پر غور کرنے کے لیے فورمز میں شامل ہونے کی آزادی ہے۔ ‘‘

ٹی ایم سی ایم پی مہوا موئترا نے سوشل میڈیا پلیٹ فارم پر ایک پوسٹ میں لکھا کہ ’’ بےشک مائی لارڈ ، آپ کو کسی بھی تقریب میں شرکت کرنے کی آزادی ہے۔ریٹائرمنٹ کے بعد عہدہ سنبھالئے، راجیہ سبھا کے نومینیٹڈ رکن بنئے،  بھگوان کو کچھ بھی کرنے سے کون روک سکتا ہے۔ہم صرف انسان ہیں - آپ سے سوال کرنے والے کون ہوتے ہیں؟‘‘

پی ٹی آئی کے مطابق، سپریم کورٹ اور مختلف ہائی کورٹس کے تقریباً 30 ریٹائرڈ ججوں نے مبینہ طور پر پ9 ستمبر کو نئی دہلی کے انڈیا ہیبی ٹیٹ سینٹر میں منعقدہ وی ​​ایچ پی کے پروگرام میں شرکت کی۔ اس دوران مرکزی وزیر قانون ارجن رام میگھوال نے بھی اس پروگرام میں شرکت کی۔ تصویریں شیئر کرتے ہوئے انہوں نے کہا کہ بات چیت ایک ترقی یافتہ ہندوستان کی تعمیر کے لیے عدالتی اصلاحات پر مرکوز تھی۔