کولمبو،11؍مئی (ایس او نیوز؍ایجنسی) معاشی اور سیاسی بحران میں پھنسے سری لنکا میں بڑے پیمانے پر تشدد شروع ہونے کے بعد کنبہ سمیت کولمبو چھوڑ چکے سابق وزیر اعظم مہندا راج پکشے اور ان کا کنبہ تب تک ترنکومالی بحری اڈے پر رہے گا جب تک کہ ملک میں حالات معمول پر نہیں ہو جاتے۔ فوج انھیں پوری سیکورٹی دے گی۔

وسیع تشدد کے بعد مجبوراً کولمبو سے بھاگنے کے بعد سری لنکائی وزارت دفاع کے سکریٹری کمل گنارتنے نے بدھ کو یہ اعلان کیا۔ خبر رساں ایجنسی سنہوا کی ایک رپورٹ کے مطابق میڈیا کو خطاب کرتے ہوئے گنارتنے نے کہا کہ جب ملک میں حالات معمول پر آ جائیں گے تب راج پکشے کو ان کی پسند کی جگہ پر لے جایا جائے گا۔ سکریٹری برائے دفاع نے کہا کہ چاہے اس میں کتنا بھی وقت لگے، فوج راج پکشے کو تب تک سیکورٹی مہیا کرائے گی، کیونکہ ایک سابق وزیر اعظم کے طور پر وہ زندگی بھر سیکورٹی کے حقدار ہیں۔

راج پکشے، ان کی بیوی شرنتھی اور ان کے سب سے چھوٹے بیٹے روہتا سمیت ان کا پورا کنبہ منگل کی صبح وزیر اعظم کی سرکاری رہائش ٹیمپل ٹریز سے بحریہ کے ہیلی کاپٹر سے روانہ ہوا تھا۔ پیر کو ان کے استعفیٰ کے بعد سے ملک میں تشدد بھڑک گیا تھا۔ پیر کو حکومت مخالف مظاہرین کے ساتھ حکومت حامی گروپوں کے تصادم کے بعد ملک میں کئی پرتشدد واقعات پیش آئے، جن میں ایک رکن پارلیمنٹ سمیت 8 لوگوں کی موت ہو چکی ہے اور 200 سے زائد افراد زخمی ہو گئے ہیں۔ حالات کو دیکھتے ہوئے پورے ملک میں کرفیو لگا دیا گیا ہے۔ ملک گیر کرفیو کو جمعرات کی صبح تک بڑھا دیا گیا ہے۔