بنگلورو،13؍اگست(ایس او نیوز)یاد گیر سے روزگار کی تلاش میں بنگلورو پہنچ کر مزدوری کے ساتھ تعلیم حاصل کر تے ہوئے ایس ایس ایل سی امتحان میں 616مارکس حاصل کر نے والے مہیش نامی طالب علم کوریاستی وزیر برائے پرائمری و سکینڈری تعلیم سریش کمار نے خود اس کی جھو نپڑی میں پہنچ کر تہنیت پیش کی۔
اطلاع کے مطابق جیون بیمہ نگر کے کرناٹک پبلک اسکول کے طالب علم مہیش نے اس مرتبہ ایس ایس ایل سی امتحان میں 625میں سے616مارکس حاصل کئے ہیں اور اپنی والدہ ملوا کے ساتھ جھونپڑ پٹی میں رہتا ہے۔
بتا یا جا تا ہے کہ مہیش اپنی والدہ کا ہاتھ بٹا نے عمارتوں کی تعمیرات میں مزدوری کر تے ہوئے تعلیم بھی حاصل کر رہا تھا۔اور اس کے والد کا انتقال اس کی 5سال کی عمر میں ہی ہو گیا تھا۔تہنیت قبول کر تے ہوئے مہیش نے بتا یا کہ اسے خوشی ہو رہی ہے کہ خود وزیر برائے تعلیم نے اس کی جھو نپڑی میں آکر تہنیت پیش کی ہے۔
مہیش نے بتا یا کہ وہ اب آئندہ سائنس میں تعلیم حاصل کر نا چاہتا ہے اور اسی طرح محنت و مشقت کے ساتھ اساتذہ کی رہنمائی میں بہتر تعلیم حاصل کر نے کی ہر ممکنہ کوشش کرے گا۔اس نے بتا یا کہ وہ کافی خوش قسمت ہے کہ اس کو وزیر تعلیم نے تہنیت پیش کی ہے۔