اب مہاراشٹر میں این آر سی کی تیاری، نظر بندی مرکز بنانے کیلئے مانگی زمین!
ممبئی،10؍ستمبر(ایس او نیوز؍ایجنسی) ویسے وزیر داخلہ امیت شاہ نے انتخابی مہم کے دوران ہی کہہ دیا تھا کہ ان کی حکومت پورے ملک میں این آر سی لاگو کرے گی اور آسام میں اس تعلق سے حتمی فہرست31اگست کو جاری بھی ہو گئی ہے اور آسام کے19لاکھ لوگوں کے نام اس فہرست میں نہیں ہیں - جن افراد کے نام فہرست میں نہیں ہیں ان میں کئی افراد کا تعلق فوج اور دیگر محکموں سے ہے- آسام کے بعد اب ایسی خبریں ہیں کہ ریاست مہاراشٹر میں بھی این آر سی لاگو کرنے کی تیاری ہو رہی ہے- میڈیا رپورٹس کے مطابق مہاراشٹر کی وزارت داخلہ ریاست میں غیر قانونی طور پر رہ رہے لوگوں کو حراست میں رکھنے کے لئے نظر بندی مراکز بنانے کی تیاری کر رہی ہے-این ڈی ٹی وی کی خبر کے مطابق مہاراشٹر حکومت کی وزارت داخلہ نے نوی ممبئی پلاننگ اتھاڑٹی سے نظر بندی مرکز بنانے کے لئے زمین دینے کو کہا ہے-حکومت کے اس قدم سے اندازہ لگایا جا رہا ہے کہ آسام کے بعد مہاراشٹر میں بھی ایسے لوگوں کا پتہ لگانے کی تیاری ہے جو غیر قانونی طور پر وہاں رہ رہے ہیں اور ان غیر قانونی لوگوں کوحراست میں رکھنے کے لئے نظر بندی مرکز بنائے جائیں گے-این ڈی ٹی وی کی خبر کے مطابق مہارشٹر سٹی اینڈ انڈسٹری ڈیولپمنٹ کارپوریشن کو مہاراشٹر حکومت کی وزارت داخلہ کی جانب سے ایک خط لکھا گیا ہے- اس خط میں نیرول میں دو سے تین ایکڑ زمین دینے کی بات کہی گئی ہے- واضح رہے کہ نیرول ممبئی سے بیس کلومیٹر کے فاصلہ پر ہے- اس خبر کے بعد مہاراشٹر میں باہر سے آئے لوگوں میں زبردست بے چینی ہے-