ممبئی،14؍اپریل (ایس او نیوز)  کا شی  میرا فائنٹین ہوٹل کے قریب ناکہ بندی کرکے گجرات جانے والی ایک بس کو کرائم برانچ اہلکاروں نے روک کر بس پر سوار23 مسافروں 2 ؍   ڈرائیور اور ایک  کلینر کو لاک ڈاؤن کی خلاف ورزی کرنے کے جرم میں حراست میں لے لیا۔  تفتیش سے معلوم ہوا ہے کہ لاک ڈاؤن کے خوف سے گجرات جانے والی اس بس پر سوار تمام مسافروں نےکوروناٹیسٹ کا جعلی سرٹیفکیٹ بنایا تھا۔

ممبئی کے معروف روزنامہ انقلاب میں شائع رپورٹ کےمطابق کاشی میرا کے سینئر پولیس انسپکٹراوی راج کراڑے نے بتایا کہ لاک ڈاؤن دوبارہ لگائے جانے کے پیش نظر مزدور اور شہری اپنے آبائی وطن لوٹنے کی کوشش کررہے ہیں۔ اس کوشش کے دوران ٹور اینڈ ٹراویلس  والے  کورونا کے آرٹی پی ٹیسٹ کا جعلی سرٹیفکیٹ بنا کر دے رہے ہیں ۔’’انہوں نے بتایا کہ ہمیں مخبر کے ذریعے  کریتا ٹراویلس اور ’ پون ٹراویلس ‘کی بس میں بعض لوگوں کے کوویڈ کے جعلی سرٹیفکیٹ  کے ساتھ سفر کرنے کی اطلاع ملی تھی۔ اطلاع کی بنیاد پرکاشی میراروڑ پرفائنٹین ہوٹل کے پاس ناکہ بندی لگائی گئی۔ جب وہاں سے گزرنے والی ’پون ٹراویلس‘ کی بس کو روکا گیا تو اس میں 23مسافر سوار تھے جو گجرات جارہے تھے۔

 انہوں نے بتایا کہ گجرات میں داخلے کیلئے کورونا کی جانچ کا نگیٹیو سرٹیفکیٹ ہونا ضروری ہے اس لئے مسافروں نے ٹور اینڈ ٹراویلس کے مالک کوزائد پیسے دے کر جعلی سرٹیفکیٹ حاصل کر رکھا تھا جو سفر کے دوران ان کے ساتھ تھا۔ اُن کے   سفر میں تعاون کرنے والے  بس ڈرائیور اور کلینر کو بھی حراست میں لیا گیا ہے اورتماموں کو کاشی میرا  پولیس  اسٹیشن کے حوالہ کردیا گیا ہے۔