مہارشٹرا میں نئی پیشرفت: گورنر نے سب سے بڑی پارٹی بی جے پی کو کیا حکومت سازی کے لئے مدعو؛ 11 نومبر تک کرنی ہوگی اکثریت ثابت
ممبئی 9/نومبر (ایس او نیوز) مہارشٹرا کے گورنر بھگت سنگھ کوشیاری نے اسمبلی انتخابات میں سب سے بڑی پارٹی بن کر اُبھرنے والی بی جے پی کو حکومت سازی کے لئے مدعو کر لیا ہے۔ اطلاعات کے مطابق گورنر نے دیویندر فڈنویس کو سرکار بنانے کی دعوت دینے کے ساتھ ہی اُنہیں 11 نومبر تک اسمبلی میں اپنی اکثریت ثابت کرنے کے لئے بھی کہا ہے۔
یاد رہے کہ 24/اکتوبر کو ہوئی ووٹوں کی گنتی کے بعد مہاراشٹرا کی جملہ 288 سیٹوں میں بی جے پی کو 105 سیٹیں حاصل ہوئی ہیں۔ شیو سینا کو 56این سی پی کو 54 اور کانگریس کو 44 سیٹیں ملی ہیں۔ 13ویں اسمبلی کی مدت کار آج ختم ہو چکی ہے اور ریاست میں حکومت سازی کو لے کر تصویر صاف نہیں ہے۔ گزشتہ کئی دنوں سے بی جے پی اور شیو سینا میں رسہ کشی جاری تھی، جس کے بعد مجبوری میں وزیر اعلیٰ دیویندر فڑنویس کو استعفی دینے پڑا تھا۔
شیو سینا کا کہنا ہے کہ انتخابات سے پہلے انہوں نے اپنی حلیف بی جے پی کے ساتھ ڈھائی ۔ ڈھائی سال کے لئے وزیر اعلیٰ کا عہدہ دینے کی بات طئے ہوئی تھی اور بی جے پی نے ان سے اس کا وعدہ بھی کیا تھا۔ لیکن بی جے پی کا کہنا ہے کہ شیو سینا سے ایسا کوئی وعدہ نہیں کیا گیا۔