مڈیکیرے7؍نومبر (ایس او نیوز) ایک زیر تعمیر عمارت کے قریب گہراگڈھا کھودنے کے لئے جب چند مزدور کام کررہے تھے تو اچانک زمین دھنس گئی جس کے نتیجے میں دو مزدور ہلاک ہوگئے جبکہ ایک مزدور کو شدید زخمی حالت میں اسپتال میں داخل کیاگیاہے۔ 

کہا جاتا ہے کہ شہر کے نیو ایکسٹنشن روڈ پرایک زیر تعمیر عمارت کے پاس یہ حادثہ پیش آیا ہے۔ریلیف ٹیم نے مٹی کے نیچے دبے ہوئی دو لاشیں نکالی جن کی شناخت گورمّا اور یشودھا کے طورپر کی گئی ہے ۔ماشا بووی نامی ایک اور مزدورکوزخمی حالت میں علاج کے لئے اسپتال میں منتقل کیاگیا ہے۔مزید ایک خاتون پدما گلے تک مٹی میں دھنس گئی تھی، مدد کے لئے دوسرے رضاکار پہنچنے سے پہلے اس کے شوہرنے بڑی عجلت اور محنت سے اسے زندہ بچالیا۔

سرکل پولیس انسپکٹر انوپ مادپّا نے بتایا کہ سُبّیا نامی ٹھیکے دار کے لئے اس مقام پرعمارت کی بنیاد رکھنے کے لئے 6مزدور 10فٹ گہراگڈھاکھودنے میں مصروف تھے۔کھدائی کے مقام پر مناسب احتیاطی تدابیر نہیں کی گئی تھیں۔اس دوران زمین دھنس جانے سے دو مزدوروں کو اپنی جان سے ہاتھ دھونا پڑا۔