مدھیہ پردیش: آبکاری افسر کے ٹھکانوں پر لوک آیکت کے چھاپے، کروڑوں کی جائیداد کا انکشاف
اندور،15/اکتوبر(آئی این ایس انڈیا)مدھیہ پردیش کے اندور میں آبکاری محکمہ کے اسسٹنٹ کمشنر آلوک کھرے کے کئی ٹھکانوں پر منگل کو لوک آیکت کی ٹیم نے چھاپہ ماری کی۔ابتدائی تحقیقات میں ہی دو مقامات پر 57 ایکڑ کے فارم ہاؤس سمیت کروڑوں کی جائیداد کا انکشاف ہوا ہے۔ٹیم مزید تفتیش میں لگی ہوئی ہے۔لوک آیکت کے ذرائع سے ملی معلومات کے مطابق اسسٹنٹ آبکاری کمشنر آلوک کھرے کے پاس آمدنی سے زیادہ جائیداد ہونے کی شکایت ملی تھی۔اس شکایت کی تصدیق کے بعد منگل کو لوک آیکت کی ٹیموں نے اندور کے علاوہ بھوپال، رائے سین اور چھتر پور میں ان کے ٹھکانو پر چھاپہ ماری کی۔ذرائع کے مطابق لوک آیکت کے مختلف ٹھکانوں سے کئی قسم کی غیر منقولہ جائیداد ہونے کے دستاویزات کے ساتھ نقدی بھی برآمد ہوئی ہے۔جو دستاویزات اب تک ملے ہیں وہ اس بات کا انکشاف کر رہے ہیں کہ پراپرٹی کروڑوں روپے کی ہے۔ بتایا گیا ہے کہ مختلف مقامات پر لوک آیکت کی سات ٹیمیں تلاشی میں لگی ہیں۔اندور میں ایک بنگلہ، ایک فلیٹ، بھوپال میں دو بنگلے سمیت دیگر مقامات پر رہائش اور زمین ہونے کی اطلاع ملی ہے۔اس کے ساتھ ہی بھوپال میں 10 ملین اور رائے سین میں پانچ لاکھ کی نقدی برآمد ہوئی ہے۔ وہیں رائے سین ضلع میں جدید سہولیات سے لیس دو فارم ہاؤس جو تقریبا 57 ایکڑ میں ہے،اس کا پتہ چلا ہے۔