بھوپال، 20؍مارچ (ایس او نیوز؍ایجنسی) مدھیہ پردیش میں کورونا وائرس کے معاملات میں مسلسل اضافہ کو دیکھتے ہوئے ریاستی حکومت نے  فیصلہ کیا ہے کہ بھوپال، اندور اور جبلپور شہروں میں ہر اتوار کو لاک ڈاؤن  نافذ کیا جائے۔ ساتھ ساتھ اس بات کا بھی اعلان کیا گیا ہے کہ ہر ہفتہ کو رات کا کرفیو نافذ رہے گا ج اور کرفیو اور لاک ڈاون پر سختی کے ساتھ عمل کیا جائے گا۔ بتایاگیا ہے کہ  کورونا وائرس کی روک تھام کے لئے کئی دیگر احتیاطی اقدامات بھی کیے گئے ہیں۔

سرکاری ذرائع کے مطابق وزیراعلی شیوراج سنگھ چوہان کی صدارت میں جمعہ دیر شام بھوپال میں کورونا کی صورتحال پر جائزہ میٹنگ کے دوران ہر اتوار کو لاک ڈاؤن لگانے اور ہر ہفتہ کو نائٹ کرفیو لگانے کا فیصلہ کیا گیا۔ یہ فیصلہ آئندہ حکم تک قابل عمل ہوگا اور ساتھ ہی یہ بھی طے کیا گیا ہے کہ ان تین شہروں میں 31 مارچ تک تمام اسکول اور کالج بند رہیں گے۔ یہاں قابل ذکر یہ بھی ہے کہ پہلے ایسی خبریں سامنے آئی تھیں کہ 21 مارچ (اتوار) کو بھوپال، اندور اور جبلپور میں لاک ڈاؤن رہے گا، لیکن بعد میں ہر اتوار کو لاک ڈاؤن رکھنے کی خبریں میڈیا ذرائع سے موصول ہوئیں۔