بھٹکل میں مدینہ کے زیراہتمام ٹی۔ٹین تعلقہ لیول کرکٹ ٹورنامنٹ کا شاندار آغاز؛ ایک اوور میں دولگاتار چھکے لگانے پر تیسرا بال فری ہٹ
بھٹکل 21 فروری (ایس او نیوز) مدینہ ویلفیر سوسائٹی کے زیراہتمام دس اووروں پر مشتمل ٹی۔ٹین تعلقہ لیول کرکٹ ٹورنامنٹ کا سنیچر سے شاندار آغاز ہوا جس میں ہر روز چار چار میچس کھیلے جائیں گے۔ بھٹکل آئیس فیکٹری کے قریب مدینہ گراونڈ میں منعقدہ اس ٹورنامنٹ میں منکی کی تین ٹیموں اور مرڈیشور کی تین ٹیموں سمیت بھٹکل تعلقہ کی جملہ 32 ٹیمیں حصہ لے رہی ہیں اور چونکہ صرف دس اووروں کے میچس ہوں گے ، کھلاڑیوں کو ہر بال پر رن بنانا ضروری ہوگا۔
کبڈی کے سابق ریاستی کھلاڑی عنایت اللہ شاہ بندری ، مجلس اصلاح و تنظیم کے نائب صدر عتیق الرحمن مُنیری، بھٹکل مسلم یوتھ فیڈریشن کے صدر عزیز الرحمن رکن الدین ندوی، بھٹکل سرکل پولس انسپکٹر دیواکر سمیت دیگر کئی ذمہ داران افتتاحی تقریب میں موجود تھے ۔
ٹورنامنٹ کے کنوینر امیر باشہ نے بتایا کہ لیگ میچس میں ہر ٹیم کو دو میچس کھیلنے ہوں گے جس کی بنیاد پر ٹیم اگلے راونڈ میں داخل ہوگی، اسی طرح اگر کسی اوور میں کھلاڑی ایک ساتھ دو لگاتار چھکے لگاتا ہے تو تیسرا بال اُسے فری ہٹ ملے گا یعنی تیسرے بال پر کھلاڑی اگر آوٹ ہوتا ہے تو اُسے آوٹ قرار نہیں دیا جائے گا۔ انہوں نے بتایا کہ کل پہلے دن جو چار میچس کھیلے گئے تھے، اُس میں مون اسٹار کے بلے باز نصر اللہ عسکری نے ایک ہی اوور میں دو لگاتار چھکے لگائے، جس کی بنیاد پر اُسے تیسرا بال فری ہٹ مل گیا، فری ہٹ میں نصر اللہ عسکری نے چوکا لگایا۔امیر باشہ نے واضح کیا کہ اگر کسی اوور کی آخری دو گیندوں پر کوئی لگاتار دو چھکے لگاتا ہے تو پھر اُسے کوئی فری ہٹ نہیں ملے گا۔ اسی طرح کھلاڑی کو ایک اوور میں ایک ہی مرتبہ ایسا چانس دیا جائے گا۔
ٹورنامنٹ کو بہتر طریقہ پر آگے بڑھانے کے لئے امیر باشہ کےساتھ ساتھ شمس تبریز کندن گوڈا اور صفاء کے ایم کو بھی کنوینر مقرر کیا گیا ہے۔
ٹورنامنٹ کے پہلے دن سنیچر کو جو چار میچس کھیلے گئے، اُس میں مون اسٹار نے کوسٹل کنگ کو ہرادیا، دوسرے میچ میں سن شائین نے سلطانی کو، تیسرے میچ میں بینا ویدیا نے پرنس منکی کو اور چوتھے میچ میں این ایس اے منکی نے کوسموس کو شکست دی ہے۔
آج ٹورنامنٹ کے دوسرے دن پہلے میچ میں نور اسپورٹس نے شاہین مخدوم کو شکست دی ہے، دوسرا میچ مدینہ اور الایمان کے درمیان جاری تھا، تیسرا میچ دوپہر بعد اسداللہ اور حنیف آباد کے درمیان اور چوتھا میچ انفا اور کٹے ویرا کے درمیان کھیلا جائے گا۔
ٹورنامنٹ میں اول آنے والی ٹیم کو 33333 روپیہ نقد مع ٹرافی سے نوازا جائے گا، جبکہ رنرز آپ کو 17999 روپیہ نقد مع ٹرافی سے نواز جائے گا۔