اقتدار میں آنے پر شہریت ترمیمی بل پر روک لگائیں گے: راہل گاندھی
دیماپور،3؍اپریل(ایس او نیوز؍یو این آئی) کانگریس صدر راہل گاندھی نے بدھ کو کہا کہ کسی بھی حالت میں شہریت ترمیمی بل (سی اے بی) کو پھر سے پارلیمنٹ میں پیش نہیں ہونے دیا جائے گا۔
راہل گاندھی نے یہاں ایک عوامی جلسے سے خطاب کرتے ہوئے کہا، ’’میں لمبے وقت تک تقریر نہیں کرناچاہتا اور اب وقت آگیا ہے کہ جب سی اے بی پر روک لگادی جائے، شمال مشرق کے مفادات کے پیش نظر یہ دوبارہ نہیں آئے گا۔‘‘
راہل گاندھی نے وعدہ کیا کہ اگر کانگریس اقتدار میں آتی ہے تو وہ شمال مشرقی ریاستوں کے خصوصی زمرے کے درجے کو فوری طور پر بحال کر دیا جائے گا اور شمال مشرقی صنعتی پالیسی پھر سے نافذ ہوگی۔
راہل گاندھی نے قومی جمہوری اتحاد (این ڈی اے) حکومت پر طنز کرتے ہوئے کہا کہ بھارتیہ جنتا پارٹی (بی جےپی)، راشٹریہ سویم سیوک سنگھ اور وزیراعظم نریندرمودی ایک نظریے کو پورے ملک میں نافذ کرنا چاہتے ہیں، وہ ایک طے نظریے پر عمل کرتے ہیں۔
انہوں نے کہا کہ وہ آپ کی ثقافت، روایت کا احترام کرتے ہیں۔ کانگریس آپ کی ثقافت کا دفاع کرے گی۔ کانگریس کے انتخابی منشور میں اسے اہمیت دی گئی ہے۔
راہل گاندھی نے کہا کہ اگر کانگریس 2019 میں اقتدار میں آتی ہے تو غریبوں کے کھاتے میں 72000 روپے سالانہ پہنچانے کے اپنے وعدے کو پورا کریں گے اور ایک سال کے اندر سبھی سرکاری خالی عہدوں کو بھر دیا جائے گا۔
