کِتّور 11؍اپریل (ایس اونیوز) جنتادل ایس اور کانگریس کے مشترکہ امیدوار آنند اسنوٹیکر نے بیلگام ضلع کے کتور اور خانہ پور علاقے میں بسنے والے مراٹھی ووٹرس کو اپنی حمایت پر آمادہ کرنے کی کوشش تیز کردی ہے۔

کتّور کی ایک انتخابی ریالی سے خطاب کرتے ہوئے آنند اسنوٹیکر نے موجودہ ایم پی اننت کمار ہیگڈے پر الزام لگایا کہ انہوں نے پچھلے بیس سال میں لوگوں کو بے وقوف بناکر ووٹ بٹورنے کے سوا کچھ بھی نہیں کیا ہے۔ کتّور کی ترقی کے منصوبے بنانا تو دور کی بات ہے ، اننت کمار نے ٹھیک طریقے سے کتور شہر دیکھا بھی نہیں ہوگا۔ انہیں اس علاقے کے مسائل حل کرنے پر دھیان دینا چاہیے تھا مگر انہوں نے یہاں کے لوگوں سے صرف ووٹ حاصل کیا ہے اور بدلے میں ترقی کے نام پر کوئی بھی تعمیری کام یہاں نہیں کیا ہے۔

اننت کمار ہیگڈے کے پانچ مرتبہ پارلیمانی الیکشن جیتنے کا پس منظر بیان کرتے ہوئے اسنوٹیکر نے کہا کہ ہبلی کے عید گاہ میدان میں جھنڈالہرانے اور ڈاکٹر چترنجن کے قتل کی وجہ سے اننت کمار کو ٹکٹ دیا گیا تھااور جیت بھی حاصل ہوئی تھی۔ پھر واجپائی کی لہر اور اس کے بعد بنگارپّا کے بی جے پی میں شامل ہونے سے اننت کمارہیگڈے کو دو بار جیت ملی۔ پانچویں مرتبہ مودی لہر کی وجہ سے اننت کما ر نے جیت درج کی تھی۔آنند اسنوٹیکر نے کہا کہ میں صرف زبانی باتیں کرنے والا شخص نہیں ہوں بلکہ عوام کے مسائل کو ان تک پہنچ کر حل کرنے والا آدمی ہوں۔

اس موقع پر خطاب کرتے ہوئے ضلع پنچایت صدرروہینی باباصاحب پاٹل نے کہا کہ اگر آنند اسنوٹیکر رکن پارلیمان بن جاتے ہیں تو انہیں سب سے پہلے کتّور کے سپگام میں واقع اسپتال کو ترقی دینی ہوگی۔اس کے علاوہ کتور ایک تاریخی مقام ہونے کی وجہ سے یہاں سیاحت کو بڑے پیمانے پر فروغ دینا ہوگا۔