کاروار:4؍جولائی  (ایس اؤ نیوز) مرکزی وزیر خزانہ نرملا سیتا رامن کے پہلے بجٹ کو لےکر اترکنڑا ضلع میں کئی  امیدیں پیدا ہوئی ہیں۔ خصوصاً ہبلی۔ انکولہ ریلوے منصوبے کی پیش کش کو لے کر کافی تجسس پایا جارہاہے۔

لوک سبھا انتخابات سے قبل پیش ہوئے درمیانی بجٹ سے بھی  کچھ ایسے ہی اندازے لگائے گئے تھے، مگرپیوش گوئیل کے  بجٹ  بھاشن میں اس کا کہیں بھی ذکر تک نہیں ہواتھا۔ لیکن اس مرتبہ چونکہ ریاست کرناٹکا کے بیلگام کے رکن پارلیمان سریش انگڑی ریلوے وزیر ہیں ،اورنرملا سیتا رامن ریاست سے ہی راجیا سبھا کے لئے منتخب ہوکر وزیر کا عہدہ سنبھالی ہوئی ہیں۔ ان وجوہات کی بنا پر خواب بیدا ر ہوئے ہیں اور خاص کر ہبلی۔ انکولہ ریلوے لائن کو آگے بڑھائے جانے کی امید لگائی جارہی ہے۔

ہبلی۔ انکولہ ریلوے ہوراٹ سمیتی کے سکریٹری وٹھل داس کامت کا کہنا ہے کہ گزشتہ بجٹ پیش ہونے سے پہلے بھی اس وقت کے وزیر سریش پربھو سےملاقات کرتے ہوئے بات رکھے تھے ،مثبت میں جواب بھی ملا تھا، مگر ہوا کچھ نہیں۔ انتخابات کے دوران جدوجہد کریں گے اس کو سیاسی رنگ دینے کا خدشہ تھا اس لئے خاموش تھے۔ اس مرتبہ کے بجٹ میں تھوڑی امید رہنے کی بات کہی۔ اس کے برعکس سمیتی کے صدر رمانند نایک کا کہنا ہے ہبلی۔ انکولہ ریلوے منصوبے کولےکر کوئی امید نہیں ہے۔ اس سے قبل ریلوے بجٹ الگ سے پیش کیاجاتا تھا جس کے مطابق امیدجتائی جاتی تھی ، اب سب کچھ ایک بجٹ کے تحت لایاگیا ہے۔ کوئی امید نہیں ہے۔ اگر وزیر صاحبہ اس تعلق سے ذکر کرتی ہیں تو ہمیں خوشی ہوگی۔