بنگلورو،11؍جون (ایس او نیوز) وزیر اعلیٰ بی ایس یڈیورپا نے اعلان کیا ہے کہ ریاست میں جہاں 27؍اپریل سے لاک ڈاؤن ہے، مرحلہ وار اَن لاک کرنے کا عمل شروع کیا جائے گا۔ یہ فیصلہ اس وقت آیا جب کرناٹک کے بہت سے اضلاع میں کووڈ۔19 کے معاملات میں کمی آئی ہے۔ ریاست کے تمام اضلاع میں موجودہ لاک ڈاؤن کو ختم نہیں کیا جاسکے گا لیکن بنگلورو شہری ضلع سمیت 20 اضلاع میں 14 جون سے پابندیوں میں نرمی لائی جائے گی۔ تاہم شیموگہ ، داونگیرے، میسورو، ہاسن، چامراج نگر، دکشن کنڑا، بنگلورو دیہی ضلع، منڈیا ، بیلگاوی اور کوڈاگو میں لاک ڈاؤن بدستور جاری رہے گا۔ 

بنگلورو شہری اور اُڈپی سمیت 20 اضلاع میں جہاں پابندیوں میں نرمی کی جائے گی، وہاں 14 جون سے شام 7 بجے سے صبح 5 بجے تک کرفیونافذ رہے گا۔ ہفتے کے آخر میں جمعہ کی شام 7 بجے سے پیر کی صبح 5 تک کرفیو رہے گا۔ اشیائے ضروریہ کیلئے صبح 6 سے دوپہر 2 بجے تک خریداری کی اجازت ہوگی۔ پارکس صبح 5 بجے سے 10 بجے تک کھلے رہیں گے۔ اسٹریٹ فروشوں کو صبح 6 بجے سے دوپہر 2 بجے تک بیوپار کرنے کی اجازت ہوگی۔ آٹو رکشا اور ٹیکسیاں دستیاب ہوں گی۔ اور ایک وقت میں صرف دو افراد ہی سفر کرسکتے ہیں۔ کارخانوں کو صرف 50 فیصد عملے کے ساتھ کھلولنے کی اجازت ہوگی۔ جب کہ کپڑے کی صنعتیں 30 فیصد ملازمین کے ساتھ کام کرسکیں گے۔ 

وزیر اعلیٰ نے کہا کہ عوام کیلئے ضروری ہے کہ وہ کووڈ۔19 ضوابط پر سختی سے عمل کریں۔ اگر صورتحال بہتر ہوتی ہے تو ہم مزید نرمی کا اعلان کرسکتے ہیں۔