ابھی نہیں ہٹے گا لاک ڈاؤن، دھیرے دھیرے دی جائے گی سہولتیں: ادھو ٹھاکرے
ممبئی،29؍جون(ایس او نیوز؍ایجنسی) مہاراشٹرا میں کورونا کی موجودہ صورتحال اور اس کے بڑھتے ہوئے اثرات کے پیش نظر ریاست میں لاک ڈاؤن میں مزید توسیع کا اشارہ دیتے ہوئے وزیر اعلیٰ ادھو ٹھاکرے نے آج واضح طور پر کہا ہے کہ 30 جون کے بعد بھی لاک ڈاؤن جاری رہے گا، تاہم اسی کے ساتھ انھوں نے یہ کہہ کر عوام کو تسلی بھی دی کہ لاک ڈاؤن کے درمیاں دھیرے دھیرے سہولیتں دی جائیں گی۔
آج عوام سے خطاب کرتے ہوئے وزیر اعلیٰ ادھو ٹھاکرے نے کہا کہ پرسوں ہم "قومی یوم ڈاکٹرس ( نیشنل ڈاکٹرس ڈے) " منا رہے ہیں۔ وہ ہمارے لیے کورونا سے لڑ رہے ہیں، میں انھیں خراج تحسین پیش کرتا ہوں۔ اس موقع پر انھوں نے کوویڈ-19 سے شفایاب ہونے والے افراد سے کہا کہ وہ آگے آئیں اور اپنا خون عطیہ کریں۔ تاکہ پلازمہ تھیراپی کے ذریعے سے دوسرے مریضوں کا علاج کیا جا سکے۔ انھوں نے بتایا کہ پلازمہ تھیراپی سے 90 فی صد مریض ٹھیک ہو رہے ہیں۔
یکم جولائی کو ریاست میں یوم ڈاکٹر اور کسانوں منائے جانے کا اعلان کرتے ہوئے انہوں نے واضح کیا کہ لاک ڈاؤن کو نہیں اٹھایا جائے گا لیکن اس سے ریاست کے شہریوں کو کوئی تکلیف نہیں ہوگی۔ کچھ جگہوں پر سختی تو کچھ جگہوں پر بہت راحت دی گئی ہے۔ وزیر اعلیٰ نے کہا کہ اب عوام کو سمجھنے کی ضرورت ہے کہ ہم کس طرح سےاحتیاط کریں کہ یہ بیماری مزید پھیلنے نہ پائے، نیز عوام کو دیگر موسمی امراض جیسے ملریا اور ڈینگو وغیرہ سے بھی اپنی اور اپنے اہل و عیال کی حفاظت کرنی چاہیے۔ انہوں نے کہا کہ میں خود سمجھتا ہوں کہ لاک ڈاؤن سے عوام کو کتنی تکلیف اٹھانی پڑتی ہے لیکن ہمیں یہ اسلئے کرنا پڑا تاکہ لوگ محفوظ رہ سکیں۔
وزیر اعلیٰ ادھو ٹھاکرے نے مزید کہا کہ عوام اس بارے میں تجسس میں ہے کہ لاک ڈاؤکے بارے میں کیا فیصلہ ہوگا، اس تعلق سے میں کہنا چاہتا ہوں کہ ابھی بحران ختم نہیں ہوا ہے۔ خطرہ ٹلا نہیں ہے۔ ہم ایک وقت میں ایک قدم اٹھانے جارہے ہیں۔ آہستہ آہستہ تمام سہولیات کا آغاز کریں گے۔ یقینا اس کا مطلب یہ نہیں ہے کہ آپ کو گھر سے باہر نکلنے نہیں دیا جائےگا۔ ہم معیشت کو تیز کرنا شروع کر رہے ہیں۔
کاروبار شروع ہو چکے ہیں مزدور بھی آرہے ہیں جس سے معیشت کو استحکام ملے گا ۔لیکن ابھی یہ مت سمجھو کہ سب کچھ ٹھیک ہے۔کیونکہ کورونا کا قہر ابھی باقی ہے، اور مریضوں کی تعداد بھی لگاتا بڑھ رہی ہے اسلئے میری آپ سے گزارش ہے کہ احتیاط برتیں کہ آپ غیر ضروری چیزوں کے لئے باہر نہ جائیں۔ اور اپنی اور اپنے خاندان والوں کی حفاظت کریں۔
