نئی دہلی،30؍مئی (ایس او نیوز؍ایجنسی) چوتھے مرحلہ کا لاک ڈاون ختم ہونے سے دو دن قبل مرکزی وزیر داخلہ امت شاہ نے آج یہاں وزیراعظم نریندر مودی سے اس بارے میں تفصیلی بات چیت کی اور انہیں اس سے متعلق ریاستوں کے وزرائے اعلی کی رائے اور مشوروں سے واقف کرایا۔

مسٹر شاہ نے جمعرات کی دیر شام تمام ریاستوں اور مرکز کے زیرانتظام ریاستوں کے وزرائے اعلی کے ساتھ فون پر با ت چیت کی تھی۔ انہوں نے کورونا وبا کی وجہ سے پورے ملک میں نافذ لاک ڈاون کے بارے میں ان کے خیالات اور مشوروں کی معلومات لی تھی۔ انہوں نے ریاستوں سے اس بارے میں اپنے مشورے اور آگے کی حکمت عملی مرکز کو بھیجنے کے لئے کہا تھا۔

ذرائع کے مطابق مسٹر شاہ نے آج مسٹر مودی سے ملاقات کے دوران انہیں ریاستوں کے وزرائے اعلی کی رائے اور مشوروں سے واقف کرایا۔ دونوں نے 31مئی کو ختم ہونے والے چوتھے مرحلہ کے بعد کی صورتحال اور اس سے نپٹنے کے منصوبوں کے بارے میں بھی تفصیل سے بات چیت کی۔ مرکزی حکومت نے اس سے پہلے بھی لاک ڈاون کو آگے برًھانے کا فیصلہ کرنے سے پہلے ریاستوں کے خیالات کو سمجھ کر ان کی بنیاد پر ہی فیصلہ کیا ہے۔ اس بار بھی اسی طرح ہی کیا گیا ہے۔

مسٹر مودی خود بھی 31مئی کو ہی اپنے ماہانہ ریڈیو پروگرام من کی بات میں ملک کے عوام سے مخاطب ہوں گے۔ یہ سمجھا جارہا ہے کہ وہ لوگوں سے موجودہ صورتحال کے پیش نظر احتیاط برتنے اور کورونا وائرس کے ساتھ زندگی جینے کا طریقہ اختیار کرنے کی بات کہیں گے۔

کورونا وباکی وجہ سے ملک میں گزشتہ 25مارچ سے مکمل لاک ڈاون نافذ ہے۔ اسے اب تک چار مرحلوں میں نافذ کیا گیا ہے اور چوتھا مرحلہ 31مئی کو ختم ہورہا ہے۔

مکمل لاک ڈاون کے تیسرے اور چوتھے مرحلہ میں مرکز کی رہنما ہدایات کی بنیاد پر الگ الگ ریاستوں نے اپنی طرف سے پابندیوں میں کافی نرمی دی ہے جس کا مقصد اقتصادی سرگرمیوں کو مرحلہ وار طریقہ سے شروع کرکے معیشت کو پٹری پر لانا ہے۔