کاروار: کووڈ مریضوں کو اسپتال لے جانے کے خلاف مقامی لوگوں نے کھڑی کی رکاوٹ۔ پولیس کی مداخلت کے بعد مسئلہ ہوا حل
کاروار،27/جولائی (ایس او نیوز) شہر کے کے ای بی کالونی میں مقیم پانچ کووِڈ متاثرین کو اسپتال لے جانے کی راہ میں مقامی لوگوں نے رکاوٹ کھڑی کردی اور پی پی ای کٹ پہن کرمریضوں کو لینے کے لئے پہنچنے والے ہیلتھ ڈپارٹمنٹ کے عملے کوایک گھنٹے تک روکے رکھا، مگر بعد میں پولیس کے اعلیٰ افسران کی مداخلت کے بعد مسئلہ حل کرلیا گیا۔
ذرائع سے ملی اطلاع کے مطابق 13جولائی کو ایک شخص کووڈ سے متاثر ہواتھا۔ وہ اسپتال میں رہ کرصحت یاب ہوکر گھر لوٹا تھا۔ مگر اس کے رابطے میں آنے والے دو بچوں سمیت پانچ لوگوں کی رپورٹ بھی پوزیٹیو نکلی اور ڈپارٹمنٹ کی طرف سے انہیں اسپتال لے جانے کے لئے ایمبولینس پہنچ گئی۔مگر جو شخص اسپتال میں پہنچ کر علاج کے بعد واپس گھر لوٹاتھا اس نے کاروار میڈیکل کالج اسپتال کی بدنظمی، کھانا پینا وقت پر میسر نہ ہونے جیسے مسائل مقامی افراد کو بتائے تھے۔ اس پس منظر میں جب پانچ نئے مریضوں کو اسپتال لے جانے جب محکمہ صحت کے اہلکار علاقہ میں پہنچے تو مقامی افراد نے زبردست مزاحمت کی اور انہیں اسپتال بھیجنے سے انکار کیا۔اس دوران اچھا خاصا ہنگامہ کھڑا ہوگیا اور لوگ طبی عملے کے سامنے احتجاج پر اتر آئے۔
عوام کی طرف سے احتجاج کی خبر ملنے پر پولیس نے موقع پر پہنچ کر لوگوں کو سمجھانے بجھانے کی کوشش کی مگر احتجاجی کوئی بھی بات ماننے کے لئے تیار نہیں ہوئے۔ پھر ٹاؤن پولیس اسٹیشن کے سرکل انسپکٹر سنتوش شیٹی اور پی ایس آئی سنتوش کمار سمیت پولس کی اضافی فورس جائے وقوع پر پہنچ گئی اور احتجاجیوں سے گفتگو کرتے ہوئے انہیں مطمئن کرنے میں کامیاب ہوئے جس کے بعد مریضوں کو اسپتال لے جایا گیا۔