نئی دہلی، 31؍جنوری (ایس او نیوز؍ایجنسی ) اڈانی گروپ سے متعلق ہنڈن برگ رپورٹ کے بعد جاری ہنگامہ کے درمیان ایل آئی سی نے پیر کے روز کہا کہ اس رپورٹ پر ہم کچھ دنوں میں اڈانی گروپ کے انتظامیہ سے بات کریں گے۔ ہمیں سوال پوچھنے کا حق ہے۔ ہنڈن برگ رپورٹ کے انکشاف میں اڈانی گروپ پر قرض کی اعلیٰ سطح اور ٹیکس ہیون کے استعمال کا الزام لگایا گیا ہے، جس کے بعد سے گروپ سوالوں کے گھیرے میں آ گیا ہے۔

رپورٹ کے مطابق ایل آئی سی کے منیجنگ ڈائریکٹر راج کمار نے کہا کہ تازہ انکشافات سے مشکل حالات پیدا ہو رہے ہیں اور ہمیں یقین نہیں ہے کہ حقیقی صورت حال کیا ہے۔ چونکہ ہم ایک بڑے سرمایہ کار ہیں اس لیے ہمیں متعلقہ سوالات پوچھنے کا حق ہے اور ہم یقینی طور سے جلد ہی ان سے بات کریں گے۔

واضح رہے کہ ہنڈن برگ ریسرچ نے اپنی رپورٹ میں اڈانی گروپ پر قرض کی اعلیٰ سطح اور ٹیکس ہیون کے استعمال سمیت کئی فرضی واڑے کے سنگین الزامات عائد کیے ہیں۔ کمپنی پر منظم طریقے سے ملک کو لوٹنے کا الزام بھی لگا ہے۔ اڈانی گروپ کی طرف سے ان الزامات کے جواب دیے گئے ہیں۔ اڈانی گروپ نے سبھی سوالوں کے جواب دیتے ہوئے ہنڈن برگ ریسرچ کے الزامات کو جھوٹا اور ملک کو بدنام کرنے والا بتایا ہے۔

اڈانی گروپ کے جواب پر ایک بار پھر ہنڈن برگ نے جوابی حملہ کرتے ہوئے اڈانی گروپ کے 413 صفحات کے جواب پر کہا کہ ہماری رپورٹ کو ہندوستان پر سوچا سمجھا حملہ قرار دے کر اہم ایشوز سے توجہ بھٹکانے کی کوشش کی گئی ہے۔ اڈانی گروپ نے کمپنی کے سربراہ گوتم اڈانی کی ملکیت میں اضافہ کو ہندوستان کی کامیابی کے ساتھ جوڑ کر دکھانے کی کوشش کی ہے۔ لیکن ہمارا ماننا ہے کہ ہندوستان کی جمہوریت کافی مضبوط ہے، آنے والے مستقبل کا ہندوستان سپر پاور ہے۔ لیکن اڈانی گروپ نے ہندوستان کے مستقبل کو پیچھے ڈھکیلنے کی کوشش کی ہے۔ کمپنی منظم طریقے سے ملک کو لوٹ رہی ہے اور خود کو نیشنلزم کی آڑ میں بچا رہی ہے۔