بھٹکل 25/مارچ (ایس او نیوز) بھٹکل ۔ساگر سرحد کے کاگل نامی مقام پر ایک جنگلی چیتے نے اچانک چلتی بائک پر حملہ کرنے کے نتیجے میں بائک سوار شدید زخمی ہوگیا، جسے بھٹکل سرکاری اسپتال میں داخل کیا گیا ہے۔
اطلاع کے مطابق ناگولّی کا رہنے والا کے اے تھامس پڑوسی ضلع شموگہ کے ساگر تعلقہ کے کاگل میں اپنا دن کا کام ختم کرکے واپس اپنے گھر ناگولّی جارہا تھا کہ ایک جنگلی چیتے نے اچانک اس کی بائک پر حملہ کردیا۔ حملے میں تھامس بائک سے نیچے گر پڑا، جس کے فوری بعد چیتا پھر اس پر حملہ آور ہوا، مگر قسمت اچھی تھی کہ چیتے کے منہ میں اس کی لنگی آگئی۔ تھامس نے لنگی اُدھر ہی اُتار کر پھینک دیا اور کسی نہ کسی طرح زخمی حالت میں متعلقہ مقام سے فرار ہو کر قریبی چرچ میں پناہ لینے میں کامیاب ہوگیا۔ جہاں سے اُسے مقامی لوگوں نے بھٹکل سرکاری اسپتال پہنچایا۔
بتایا گیاہے کہ متعلقہ چیتے نےبعد میں دوسرے ایک بائک پر بھی حملہ کرنے کی کوشش کی، مگر بائک سوار اپنی بائک کو تیزی کے ساتھ دوڑا کر حملہ سے بچنے میں کامیاب ہوگیا۔
تھامس کے ہاتھوں اور پیروں سمیت جسم کے دیگر حصوں میں بھی شدید چوٹ لگی ہے اور اسے بھٹکل سرکاری اسپتال میں داخل کرکے مرہم پٹی کی گئی ہے۔ اطلاع ملتے ہی محکمہ جنگلات کے آفسران نے اسپتال پہنچ کر تھامس کی خبرگیری کی ہے اور کاگل پولس تھانہ کو بھی واقعے کی جانکاری دی ہے۔
خیال رہے کہ کاگل اور اطراف کا علاقہ جنگلات سے گھرا ہوا ہے ، جہاں جنگلی جانور راتوں کے اوقات میں سڑکوں پر بھی نکل آتے ہیں۔