ہوناور:15؍فروری(ایس اؤ نیوز) ہوناور تعلقہ کے کڈلے کاجو باغ میں رہ چلتے ایک دیہی فرد پر چیتا نے حملہ کردیا لیکن متعلقہ شخص نے چیتے سے لڑتے ہوئے اپنی جان بچانے میں کامیاب ہوگیا۔ متعلقہ شخص کی شناخت وینکٹ رمن تمنا ہیگڈے کی حیثیت سے کی گئی ہے، واقعہ جمعہ کی شام کو پیش آیا۔
ذرائع سے ملی اطلاع کے مطابق جب وینکٹ رمن باغ سے لوٹ رہاتھا تو چیتے نے اچانک حملہ کردیا تھا۔ اس سلسلےمیں جانکاری دیتے ہوئے اس کا رشتہ دار گنیش ہیگڈے نے بتایا کہ وینکٹ رمن کی گردن کو نشانہ بنا کر چیتے نے حملہ کیا تھا۔ وینکٹ رمن بروقت اپنے دونوں ہاتھوں کو آڑے کیا تو چیتے نے ہاتھوں کو کاٹ لیا۔ زخمی ہوکر زمین پر گرنے کے بعد اس نے وہاں موجود پتھر سے چیتے کے چہرے پر دے مارا، تب چیتا گھبرا کر بھاگ گیا جس سے اس کی جان بچ گئی۔ زخمی وینکٹ رمن کا ہوناور سرکاری اسپتال میں علاج چل رہاہے۔ دیہات میں پہلی مرتبہ چیتا نظر آنے سے دیہی عوام خوف میں مبتلا ہیں۔ فوریسٹ افسران نے جائے وقوع پر پہنچ کر جائزہ لیا ہے۔