نگران لبنانی وزیراعظم سعدالحریری نئی کابینہ کی تشکیل کا کوئی ارادہ نہیں رکھتے
بیروت /27نومبر(آئی این ایس انڈیا) لبنان کے نگران وزیراعظم سعد الحریری نے کہا ہے کہ وہ نئی حکومت بنانے کا کوئی ارادہ نہیں رکھتے۔انھوں نے صدر میشیل عون پر زوردیا ہے کہ وہ نئے وزیراعظم کی نامزدگی کے لیے مشاورت کا عمل شروع کریں۔انھوں نے منگل کے روز ایک بیان میں کہا ہے کہ”میں اپنے اصول پر کاربند ہوں،مجھے نہیں کسی اور کونئی حکومت بنانی چاہیے جو نوجوان مردوخواتین کی اْمنگوں کو پورا کرے۔سعدالحریری لبنان میں حکمراں اشرافیہ کی بدعنوانیوں اور ملک کو درپیش معاشی مسائل کے خلاف عوامی احتجاجی مظاہروں کے بعد اپنی کابینہ سمیت مستعفی ہوگئے تھے۔ تاہم صدر عون نے نئی حکومت کی تشکیل تک انھیں نگران وزیراعظم کے طور پر کام جاری رکھنے کا کہا تھا۔اُنھوں نے اس بیانیے پر بھی تنقید کی ہے کہ نئی حکومت کی تشکیل ان پرمنحصر ہے۔ان کا کہنا تھا کہ کچھ لوگ تمام حقائق کو جانتے بوجھتے ہوئے ابھی تک عوام سے یہ کہہ رہے ہیں کہ وہ متردد سعدالحریری کے فیصلے کے منتظر ہیں اور غلط طور پر مجھے نئی حکومت کی تشکیل میں تاخیر کا ذمے دار ٹھہرا رہے ہیں۔انھوں نے ٹیکنو کریٹ پر مشتمل نئی حکومت کے لیے اپنے مطالبے کا اعادہ کیاہے اور اس امید کا اظہار کیا ہے کہ صدر میشیل عون اس تجویزپر غور کریں گے اور پارلیمان سے مشاورت کے بعد کسی ایسے ہی وزیراعظم کو نئی حکومت بنانے کی ذمے داری سونپیں گے۔سعدالحریری کا کہنا تھا کہ یہ میری مخلصانہ امید ہے اور مجھے توقع ہے کہ میرے واضح فیصلے کے بعد صدر آئین کی پاسداری کرتے ہوئے ملک کی قسمت اور عوام کے تحفظ کے پیش نظر فوری طور پر ایک نیاوزیراعظم نامزد کریں گے اور انھیں نئی حکومت تشکیل دینے کی ذمے داری سونپیں گے۔میری خواہش ہے کہ وہ اس مشن میں مکمل کامیاب ہوں۔