بھٹکل 21 ستمبر  (ایس او نیوز) بھٹکل اور اُترکنڑا کے معروف کبڈی کھلاڑی، بہترین  آل راونڈر اور پرشورام ٹیم کو کامیابی سے ہمکنار کرنے  والے  اہم ستون منوج نائک کنداپور اسپتال میں انتقال کرگئے ، اُن کی عمر صرف 31 سال تھی۔

ذرائع سے ملی اطلاع کے مطابق آج منگل  دوپہر اچانک ان کے سینے میں درد ہوا، وہ کنداپور میں ہی موجود تھے، اس لئے فوری کنداپور اسپتال لے جایا گیا، مگر  اسپتال پہنچنے تک وہ دم توڑ چکے تھے۔ غیر شادی شدہ منوج نائک کے اچانک انتقال سے ان کی والدہ سمیت  تین بہنوں اور  ایک بھائی صدمے  سے دوچار ہوگئے ۔ ان کے انتقال پر کبڈی حلقوں میں بھی    افسوس کی لہر دوڑ گئی اور کافی لوگ بالخصوص کبڈی پریمی  انتقال کی خبر ملتے ہی  منکولی میں واقع ان کے مکان پہنچ گئے اور گھروالوں سے تعزیت کی۔

پرشورام ٹیم کے اہم ستون سمجھے جانے والے  منوج نائک   اپنے بہترین کھیل سے نہ صرف بھٹکل بلکہ پورے ضلع میں معروف تھے، وہ دو مرتبہ ریاست  کرناٹک کی کبڈی  ٹیم  میں بھی شامل ہوئے تھے اور  نیشنل لیول کبڈی ٹورنامنٹ میں حصہ لیتے ہوئے  بہترین کھیل کا مظاہرہ پیش کیا تھا۔  کئی ٹورنامنٹوں میں ان کو بیسٹ رائیڈر سمیت بیسٹ آل راونڈر کے خطاب سے بھی نوازا جاچکا ہے۔

ان کے انتقال پر اُترکنڑا  ڈسٹرکٹ کبڈی فیڈریشن کے  اعزازی سرپرست  اور کرناٹک کبڈی ٹیم کے  سابق کھلاڑی عنایت اللہ شاہ بندری سمیت بھٹکل مسلم یوتھ فیڈریشن  کے  ذمہ  داران  نے  بھی گہرے دکھ کا اظہار کیا ہے۔ بھٹکل کی مختلف  ٹیموں بالخصوص  لائن، رویل، کوسموس، مون اسٹار اور سن شائین  کے ذمہ داران نے بھی  گھر والوں کے ساتھ تعزیت کرتے ہوئے ان کے انتقال پر گہرے رنج و غم کا اظہار کیا ہے۔ منوج  نائک کے ساتھ پرشورام ٹیم میں  کبڈی کھیلنے والے   بھٹکل کے رکن اسمبلی سنیل نائک نے بھی منوج کے اچانک انتقال پر گہرے افسوس کا اظہار کیا ہے، انہوں نے بتایا کہ  منوج ایک بہترین رائیڈر ہونے کے ساتھ ساتھ بہترین راونڈر بھی تھا، ایم ایل اے سنیل نائک نے بتایا کہ اس کے اچانک انتقال کی خبر سے مجھے گہرا صدمہ پہنچا ہے۔

فی الحال میت کنداپور سرکاری  اسپتال میں ہے، پوسٹ مارٹم کے بعد  رات آٹھ بجےتک بھٹکل لائی جائے  گی ۔