بنگلورو،9؍ستمبر(ایس او نیوز) ہندوستانی خلائی ایجنسی اسرو کے سربراہ کے شیون نے یہ اعتراف کرتے ہوئے کہ مشن چندرا یان 2میں شامل وکرم ماڈیول کی چاند پر لینڈنگ ناکام رہی یہ کہا ہے کہ وکرم ماڈیول کا چاند کی سطح پر پتہ لگالیا گیا ہے۔
انہوں نے اتوار کے روز ایک اخباری کانفرنس میں کہا کہ ’’ہم نے لینڈر وکرم کے لوکیشن کا پتہ لگا لیا ہے۔ آربیٹر میں لگے ہائی ریزولیوشن کیمرے نے لینڈر کی ایک تھرمل امیج بھی کھینچی ہے۔ حالانکہ تاحال لینڈر سے کسی طرح کا رابطہ قائم نہیں ہو پایا ہے۔ ہم لگاتار اس سے رابطہ قائم کرنے کی کوشش کر رہے ہیں۔ جلد ہی اس حوالہ سے معلومات دی جائے گی۔‘‘
انہوں نے بتایا کہ شاید ورکم کی چاند کی سطح پر شدت کے ساتھ لینڈنگ کے نتیجے میں اس سے رابطہ منقطع ہوگیا ہوگا۔انہوں نے کہا کہ چندرا یان 2کے آربیٹر نے چاند پر وکرم کی نشاندہی کی ہے۔ وکرم آربیٹر چاند کے مدار کا پچھلے دو دن سے چکر کاٹ رہا ہے۔آئندہ ایک سال تک آربیٹر چاند کے چکر کاٹتا رہے گا۔ اس آربیٹر سے جس کا وزن 2379کلو گرام ہے پے لوڈ جوڑے گئے ہیں جو چاند کے موسمیات کا جائزہ لے کر اسرو کو تفصیلات فراہم کرتے رہیں گے۔ اس میں لگے کیمروں کی مدد سے چاند پر وکرم ماڈیول کی نشاندہی ممکن ہو سکی ہے۔ انہوں نے کہا کہ اسرو کی طرف سے وکرم لینڈر سے رابط قائم کرنے کی کوشش اب بھی جاری ہے۔ لیکن اس سے رابطہ بحال ہونے کی امید بہت کم ہے۔انہوں نے کہا کہ چاند کے جنوبی خطے میں وکرم کی آسان لینڈنگ کروانے میں اسرو کی کوشش ناکام رہی ہے۔ چاند کی سطح پر اترتے ہوئے 2.1کلومیٹر کی دوری پر وکرم لینڈر کا اسرو سے رابطہ منقطع ہو گیا تھا۔ انہوں نے کہا کہ اگر وکرم لینڈر کامیابی سے چاند پر اترجاتا تو سویت یونین،امریکہ اور چین کے بعد چاند پر سافٹ لینڈنگ میں کامیابی حاصل کرنے والے ممالک میں ہندوستان بھی شامل ہوجاتا۔تقریباً ایک دہائی قبل مشن چندرا یان۔1ہوا تھا اور اس مشن کے ذریعے آربیٹر کو چاند کے مدار میں داخل کیا گیا۔ مشن چندرایان 2پر اسرو نے 978کرڑ روپے خرچ کئے۔اس میں سیٹلائٹ پر 603کروڑ روپے اور جی ایس ایل وی راکٹ پر 375کروڑ روپے صرف کئے گئے-