پٹنہ،24؍نومبر (ایس او نیوز؍یواین آئی) غیر منقسم بہار کے مشہور چارہ گھوٹالہ کے ایک اہم معاملے میں ملزم ریاست کے سابق وزیراعلیٰ لالو پرساد یادو آج پٹنہ واقع مرکزی جانچ بیورو (سی بی آئی) کی خصوصی عدالت میں حاضر ہوئے - چارہ گھوٹالہ معاملوں کی سماعت کے لئے تشکیل سی بی آئی کی خصوصی عدالت کے جج پرجیش کمار کی عدالت میں بیٹھتے ہی مسٹر یادو اپنے وکیل سدھیر کمار سنہا، پربھات کمار اور اعجاز حسین کے ساتھ حاضر ہوکر اپنی موجودگی درج کرائی - ساتھ ہی مسٹر یادو کی جانب سے آج عدالت میں وکیلوں کا وکالت نامہ بھی داخل کیا گیا - مسٹر یادو کی حاضری کے دوران کورٹ کے سکیوریٹی انتظامات سخت کئے گئے تھے - مسٹر یادو کورٹ احاطہ میں قریب پانچ منٹ تک رکے - اس دوران مسٹر یادو نے عدالت سے خود کہاکہ وہ بیمار چل رہے ہیں، اس لئے ہر ایک تاریخ پر حاضر نہیں رہ سکیں گے لیکن جب بھی ضرورت ہوگی اور عدالت کا حکم ہوگا تو وہ حاضر رہیں گے - گذشتہ تاریخ پر عدالت نے سبھی ملزمین کو عدالت میں جسمانی طور پر حاضر ہونے کا حکم دیا تھا- اسی حکم پر عمل کرتے ہوئے مسٹر لالو پرسادیادو آج جسمانی طور سے حاضر ہوئے تھے - آج عدالت میں مسٹر یادو سمیت چار ملزمین جسمانی طور سے حاضر ہوئے جبکہ15ملزمین کی جانب سے وکالتاً حاضری دی گئی - عدالت نے معاملے میں 30نومبر2021کی آئندہ کی تاریخ مقرر کرتے ہوئے سی بی آئی کو اپنے گواہ پیش کرنے کا حکم دیا- معاملہ غیر منقسم بہار کے بانکا ذیلی خزانے سے فرضی دستاویز کی بنیاد پر مویشی محکمہ میں لگ بھگ46لاکھ روپے کی غیر قانونی نکاسی کا ہے - سی بی آئی نے اس معاملے کی ایف آئی آر سال1996میں آر سی63A/1996کے طور پر درج کی تھی - اس معاملے میں سی بی آئی نے44لوگوں کے خلاف چارج شیٹ داخل کی تھی لیکن سماعت کے دوران کئی ملزمین کی موت ہوچکی ہے، جس کے بعد28ملزمین کے خلاف سماعت زیر التوا ہے -

ایسا سمجھا جارہاہے کہ ان 28ملزمین میں سے بھی کئی لوگوں کی موت ہوچکی ہے - یہی وجہ ہے کہ عدالت نے ملزمین کو جسمانی طور سے حاضر رہنے اور معاملے میں مناسب پیروی کرنے کی ہدایت دی تھی - معاملہ پہلے سے ہی سی بی آئی کی جانب سے گواہی کیلئے زیر التوا ہے -