کندگول میں انتخابی ریلی کے دوران بی جے پی لیڈروں پر ڈی کے شیوکمار نے کیا طنز؛ پوچھا بی جے پی والے مجھے کب بھیج رہے ہیں جیل ؟
بنگلورو۔10/مئی(ایس او نیوز) بی جے پی کی طرف سے بارہا کرپشن کے الزامات کا سخت جواب دیتے ہوئے آج ریاستی وزیر برائے آبی وسائل ڈی کے شیوکمار نے کندگول میں انتخابی مہم چلاتے ہوئے بی جے پی قائدین سے سوال کیا کہ وہ بتائیں کہ مجھے جیل کب بھیج رہے ہیں۔
اخباری نمائندوں سے بات چیت کرتے ہوئے ڈی کے شیوکمار نے کہاکہ بی جے پی کے سبھی لیڈر یہ الزام عائد کرتے ہیں کہ ڈی کے شیوکمار بدعنوان ہیں، اگر بدعنوانی کے کوئی ثبوت ہیں تو مجھے جیل کیوں نہیں بھیج دیتے۔ میں بھی انتظار کررہاہوں کہ یہ لوگ کب مجھے جیل بھیجیں گے۔ ڈی کے شیوکمار نے کہاکہ بی جے پی قائدین کے ان بیہودہ الزامات کی انہیں کوئی پرواہ نہیں پارٹی نے انہیں کندگول حلقے میں پارٹی امیدوار کو کامیاب بنانے کی ذمہ داری سونپی ہے، اور وہ اسے بخوبی نبھانا جانتے ہیں۔
انہوں نے کہاکہ کانگریس قیادت کو معلوم ہے کہ ان کی سیاسی قوت کیا ہے، اسی لئے ان کی صلاحیتوں پر اعتبار کرتے ہیں۔ بی جے پی کو یہ ہضم نہیں ہورہا ہے۔ بی جے پی قائدین کے اس اعلان پر کہ کندگول حلقے میں کانگریس کی ہار یقینی ہے، ڈی کے شیوکمار نے کہاکہ بی جے پی لیڈر جو چاہے کہہ لیں، انہیں پارٹی نے جو ذمہ داری سونپی ہے اسے وہ مکمل طور پرنبھائیں گے۔ انہوں نے کہا کہ اس حلقے کے لئے مسلسل جدوجہد کرکے عوام کے درمیان رہنے والے سی ایس شیولی کی ناگہانی کی موت کے سبب کانگریس نے ان کی بیوہ کو میدان میں اتارا ہے۔انہیں یقین ہے کہ کانگریس جے ڈی ایس کارکن متحد ہوکر یہاں سے کانگریس امیدوار کی کامیابی کو یقینی بنائیں گے۔
