کنداپور،11؍جون (ایس او نیوز) آپسی رنجش کی وجہ سے ایڈموگے گرام پنچایت میں کار سے روند کر اودئےگانیگا نامی شخص کو ہلاک کرنے کے الزام میں کلیدی ملزم گرام پنچایت صدر پرانیش ایڈیال کو قتل کے کچھ گھنٹوں بعد ہی گرفتار کیا گیا تھا ۔ 
    
اس کے بعد آر ایس ایس لیڈر بال چندرا بھٹ اور راجیش بھٹ نامی ملزمین کو گرفتار کرکے عدالتی حراست میں بھیج دیا گیا۔ اب منوج کمار، سداشیوا اور وینو گوپال شیٹی کو بھی اسی جرم میں ملوث ہونے کے الزام میں گرفتار کیا گیا ہے۔ ان تمام ملزمین کو 29 جون تک عدالتی حراست میں بھیج دیا گیا ہے۔
    
خیال رہے کہ 5 جون کو اودئے گانیگا کی ہلاکت کے بعد اس کی بیوی نے پولیس کے پاس جو شکایت درج کروائی ہے اس کے مطابق اودئے گانیگا کو کار سے ٹکر مارنے کے بعد ڈنڈنے سے پیٹ کر قتل کیا ہے۔ لیکن معتبر ذرائع سے یہ بات سامنے آئی ہے کہ پرانیش اور اس کی ٹولی نے اودئے گانیگا کو بات چیت کرنے کے بہانے بلا کر ایک ڈنڈے سے اس پر جان لیوا حملہ کیا۔ اس کے باوجود اودئے نے جب اٹھ کر کھڑے ہونے کی کوشش کی تو کار میں موجود پرانیش کے نابالغ بیٹے نے اس پر گاڑی چڑھا دی ۔ اودئے پر کار چڑھانے والا یہ نابالغ ملزم لاپتہ ہوگیا ہے اور پولیس کی تلاش میں لگی ہے۔ 
    
یہ بات بھی معلوم ہوئی ہے کہ ملزمین کو پناہ دینے کے الزام میں بی جے پی ضلع صدر سمیت مزید دو ملزمین اور کلیدی ملزم کے بیٹے کو جلد گرفتار کیے جانے کی توقع  ہے۔