کنداپور، 2؍ دسمبر (ایس او نیوز) کنداپور تعلقہ کے کوٹیشور میں واقع یو وی اے میریڈین ہال میں 27 تا 29  نومبر کو جو زیورات کی نمائش لگی تھی اس میں گاہک کی شکل میں آنے والے تین لوگوں نے تقریباً 3 لاکھ روپے مالیت کی سونے کی چوڑیوں پر ہاتھ صاف کر دیا ۔

بتایا جاتا ہے کہ اس ایگزیبیشن کا اہتمام منگلورو کی اورا فائن جیویلری پرائیویٹ لمیٹیڈ کی طرف سے کیا گیا تھا ۔ جب نمائش اختتام پزیر ہوئی تو کمپنی نے زیورات کا اسٹاک چیک کیا جس پر پتہ چلا کہ 43 گرام وزنی  دو جوڑی سونے کی چوڑیاں غائب ہیں ۔ جس کی مالیت کا اندازہ 2.86 لاکھ روپے لگایا گیا ہے ۔
سی سی ٹی وی فوٹیج چیک کرنے پر معلوم ہوا کہ دو خواتین اور ایک مرد کی ٹولی نے یہ حرکت کی ہے مگر چونکہ وہ سب فیس ماسک پہنے ہوئے ہیں اس لئے ان کا چہرا پہچاننا مشکل ہوگیا ہے ۔

اورا فائن جیویلری کمپنی کے منیجر کی شکایت پر کنداپور پولیس نے کیس درج کر لیا ہے ۔ مزید تحقیقات جاری ہے ۔