کنداپور26/اکتوبر(ایس او نیوز) یہاں تھیکٹّے میں راگھویندرا مٹھ کے سامنے ٹریفک پولیس نے گاڑیوں کی چیکنگ شروع کی تھی۔ اس دوران پولیس اہلکار نے ایک بائک سوار کو روکنے کی کوشش کی مگر جب اس نے گاڑی نہیں روکی توپولیس اہلکار نے بڑی بے پروائی سے بائک کے ہینڈل پر جھپٹا مارا جس کی وجہ سے بائک سمیت سوار سڑک پر گر کر زخمی ہوگیا۔

  زخمی بائک سوار کی شناخت کوراواڈی کے رہنے والے اُلّاس (27سال) کے طور پر کی گئی ہے۔پتہ چلا ہے کہ بائک کے ساتھ گرنے سے الاس کے سر پر گہری چوٹ آئی ہے۔جبکہ بائک پر جھپٹنے والے پولیس اہلکارکے پاؤں پر گرنے کی وجہ سے وہ بھی زخمی ہوگیا ہے۔ جیسے ہی یہ واقعہ پیش آیا تو مقامی افراد مدد کے لئے دوڑ پڑے اورزخمی الّاس کو علاج کے لئے اسپتال میں منتقل کیااور پولیس کی اس بے پروائی اور غیر ذمہ دارانہ سلوک کی مذمت کرتے ہوئے احتجاج کیا۔کوٹا پولیس اسٹیشن کے افسران نے موقع پر پہنچ کر حالات پر قابو پانے اور مشتعل عوام کو سمجھانے بجھانے کی کوشش کی۔ زخمی ٹریفک پولیس اہلکار کو بھی علاج کے لئے اسپتال میں داخل کیا گیا ہے۔